Bakıda sərnişin avotbuslarında gediş haqqları gələn ildən yalnız kartla ödəniləcək. 

Nəqliyyat Nazirliyinin mətbuat xidmətinin rəhbəri Namiq Həsənovun ANS PRESS-ə verdiyi məlumata görə, artıq on mindən çox kart satılıb.

“Düzü bu ilin sonuna qədər bu işləri yekunlaşdırmaq istəyirdik. Lakin bəzi texniki problemlər işləri gecikdirdi. Artıb gediş haqqların kartla ödənilməsi mexanizminə maraq artıb. Bu sahədə yaranan problemlər bu ilin sonuna qədər tam həll olunacaq”, - deyə Namiq Həsənov bildirib.

Nazirlik rəsmisi bəzi avtobuslarda quraşdırılan validatorların qırılması və çıxarılması məsələsinə də münasibət bildirib. Onun sözlərinə görə, bu əməllər qanunaziddir. Buna görə, həmin avtobus xəttinə nəzarət edən sahibkar məsuliyyət daşıyır. Sahibkar hər bir xarab olan validatora görə ciddi şəkildə cəzalanacaq.

Bakı nəqliyyatında vahid ödəmə kartlarının tətbiq olunmasına münasibət bildirən Namiq Həsənov bu məsələnin də həll olunacağını deyib. Lakin Namiq Həsənov əvvəllər deyildiyi kimi, bir kartla həm metrodan, həm də avtobuslardan istifadə olunmasının hələlik qeyri-mümkün olduğunu bildirib.

“Həmin kartlarla gələcəkdə taksilərdə də ödəniş etmək mümkün olacaq. Lakin metroda həmin kartlardan istifadə mümkünsüzdür”, - deyə Namiq Həsənov bildirib.