Xəzər rayonu, Şüvəlan qəsəbəsində yerləşən, “Mayak” adı ilə tanınan çimərlikdə mövsüm sonrası yaranan problem özünü göstərməkdədir.

ANS TV-nin məlumatına görə, çimərlikdəki zibillik sahildən cəmi 5-10 metr aralıda toplanıb. Həmin bu zibilliyin o tərəfində isə mövsümdə çimərliyə gələn insanlara xidmət göstərən bir neçə restoran da var ki, havaların soyuması ilə əlaqədar olaraq öz fəaliyyətini dayandırıb. Amma özlərindən sonra sahildə bu cür zibilliyi buraxdıqdan sonra.

Bu qədər üfunət yaradan zibilin çimərliyə fərdi şəkildə gələn insanlar tərəfindən atılmasını düşünmək inandırıcı olmazdı. Çünki Balaxanı zibilliyini xatırladan sahil kənarı, kifayət qədər ərazini zəbt edib. Nəzərə alsaq ki, ətrafda mövsümü restoran və kafelər yerləşir və onların da ətrafında zibil qalıqlarının toplanması üçün heç bir yer yoxdur, onda bu cür zibilliyin onlar tərəfindən yaradılmasını düşünmək heç də çətin deyil. Sahil kənarına atılan tullantıların hansı səbəbdən göstərilən ərazidə toplandığını öyrənmək üçün ətrafa baxış keçirdik. Amma məlumat almaq üçün heç kimi tapa bilmədik. Görünür çimərlik mövsümü başa çatdığından onlar da işlərini tamamlayıb, bu cür natəmiz şəkildə olsa belə, işlərini bitmirş sayıblar.

O üzdən də məsələni aydınlaşdırmaq üçün baş çəkdik Xəzər Rayonu İcra hakimiyyətinə. Qurum da bizi istiqamətləndirdi, Şüvəlan qəsəbəsinin icra nümayəndəliyinə. İcra nümayəndəsi Mirzərauf Axundov müsahibədən çəkinsə də, şifahi olaraq bildirdi ki, qanuna görə çimərlikdə fəaliyyət göstərən restoran və kafelər Mənzil İstismar İdarəsi və ya digər icra qurumları ilə təmizlik üçün müvafiq müqavilə bağlamalıdır. Bu müqavilələr olmadığı üçün bütün cavabdehlik obyekt sahibləri daşıyır. Amma buna baxmayaraq qurum rəsmisi bizə söz verdi ki, ərazini təmizləmək üçün günü sabahdan işlərə başlayacaqlar. Ümüd edirik ki, sahil kənarında çalışaraq qazanc əldə edən restoran və kafe sahibləri də yerli qurumlara yardımçı olar, ən azı mövsum boyu qazandıqları gəlir naminə.