Məktəbdən Xeberle.com-a verilən məlumata görə, konfransda məktəbin müəllim kollektivi ilə yanaşı Sumqayıt şəhər Təhsil şöbəsinin müdiri Nizami Namazov da iştirak edib. Konfransdan öncə N.Namazov məktəbdən yaradılan şəraitlə tanış olub, dərs prosesinin gedişini izləyib.

Dövlət Himninin səslənməsi ilə açıq elan edilən konfransda giriş sözü ilə çıxış edən məktəbin direktoru Bəhruz Səlimxanov bildirib ki, Prezident İlham Əliyevin müvafiq Sərəncamı ilə 2016-cı il Azərbaycanda "Multikulturalizm ili” elan edilib. "Multikulturalizm Azərbaycanda həyat tərzidir” mövzusunda məruzə edən B. Səlimxanov Prezident İlham Əliyevin Azərbaycanda multikulturalizm ənənələrinin qorunmasına yönəldilmiş bu siyasətin uğurla inkişaf etdirdiyini tədbir iştirakçılarının diqqətinə çatdırıb.

Multikulturalizmin bizim dövlət siyasəti və həyat tərzimiz olduğunu nəzərə alaraq, İlham Əliyev bu sahədə beynəlxalq əməkdaşlığa xüsusi önəm verir. O, qeyd edib ki, ölkəmizdə yaşayan dini azlıqların dilinin, dininin və mədəniyyətinin inkişafına dövlətimiz tərəfindən xüsusi diqqət və qayğı göstərilir. Xalqımız əsrlər boyu tolerantlıq və dünyəvilik ənənələrini qoruyub saxlayıb. Ölkəmizdəki tolerantlıq mühiti dünyaya nümunədir.

Daha sonra məktəbin müəllimləriSamirə Cəfərova "Multukulturalizm siyasətinin mahiyyəti və əhəmiyyəti”, Rövşən İmanov "Azərbaycanda yaşayan bütün azsaylı xalqların nümayəndələri Azərbaycan Respublikasının bərabərhüquqlu vətəndaşlarıdır”, Sevda Əmirşahova "Azərbaycanda azsaylı xalqlar” və Faiq Bayramov "Azərbaycanda multukulturalizm ənənələri və əhəmiyyəti” mövzularında çıxış ediblər. Çıxışlarda multikulturalizmin Azərbaycanın dövlət siyasətində prioritet istiqamət olduğu vurğulanıb. Azərbaycan multikulturalizminin və ümumilikdə multikulturalizm konsepsiyasının ölkənin, dövlət təhlükəsizliyinin təmin olunmasında rolundan söz açılıb. Multikulturalizm ənənələrinin tarixi qədimliyi haqqında danışılaraq, bu gün də bu ənənələrin Azərbaycanın dövlət siyasətinin tərkib hissəsi olduğu diqqətə çatdırılıb.

Sumqayıt şəhər Təhsil şöbəsinin müdiri Nizami Namazov isə çıxışında Azərbaycanın uğurlu və məqsədyönlü dövlət siyasətindən bəhs edib. Vurğulayıb ki, bütün sahələr üzrə həyata keçirilən uğurlu siyasi strategiya multikulturalizmin inkişafı və təbliği baxımından da mühüm rol oynayır. O, prezident

İlham Əliyevin müvafiq sərəncamı ilə 2016-cı ilin Azərbaycanda "Multikulturalizm ili” elan olunmasına diqqət çəkərək, bunun bütün dünyaya bir mesaj olduğunu, tarixi və siyasi əhəmiyyət kəsb etdiyini bildirib. N. Namazov multikulturalizmin nəticəsi olaraq Azərbaycandakı bütün xalqların bərbərhüquqlu, sülh, əmin-amanlıq şəraitində, birgə və mehriban yaşadıqlarını söyləyib.

Təhsil şöbəsinin müdiri qeyd edib ki, xalqımız tarixin bütün dövrlərində digər xalqların nümayəndələrin hörmət və məhəbbətlə yanaşıb, daim insan hüquq və azadlıqlarının, birgə yaşayışının təmin edilməsinə səy göstərib. Bu baxımdan ölkəmizdəki multikultural dəyərlər daim təbliğ edilməli və dövlət siyasətinin tərkib hissəsi olaraq davam etdirilməlidir.

Sonda Nizami Namazova məktəbin müəllimlərinin həmmüəllifliyi ilə nəşr olunan "Məktəb direktorunun stolüstü kitabı” hədiyyə olunub.