Bu kiçik emalatxanada göz oxşayan rəsm əsərləri və heykəltəraşlıq nümunələri hazırlanılır. Onların müəllifi isə uşaq vaxtından bu sahəyə marağı olan Vüqar İmanquliyevdir. Rəssamlıq Akademiyasının məzunu olan gəncin diplom işi Milli Qəhrəman Mübariz İbrahimovun heykəlinin hazırlanması olub. Sözügedən heykəltəraşlıq nümunəsi Bakıda keçirilən "Şəxsiyyətlərin portreti” sərgisində I yerə layiq görülüb. Hazırda bu abidə Azərbaycan Dövlət Neft və Sənaye Universitetində öz yerini tutub. Vüqar İmanquliyev sənətin incəliklərini belə izah edir. Müəllifin hazırladığı nümunələr onun daxili dünyasını, hiss və həyəcanını, həyat sevgisini əks etdirir. O, bir azərbaycanlı kimi yaratdığı sənət əsərlərində daha çox milli mövzulara üstünlük verir. Vüqar incəsənətin bu sahəsi üzrə Azərbaycanı dünyaya tanıdan heykəltəraşlardan olmaq istəyir. Deyir ki, gördüyü iş əziyyətli və məsuliyyətli olsa da o, bundan zövq alır. Heykəlləri ərsəyə gətirmək üçün plastilin, gil, gips, mis, tunc və s. materiallardan istifadə edir. İndiyədək 50-dən çox sənət işinin müəllifi olan Vüqarın bir arzusu var. Dağlıq Qarabağımızın işğaldan azad olunması və orada yaratdığı əsərlərdən ibarət fərdi sərgisini təşkil etmək.

RAMİL ZEYNALLI