“Uğurun sirri” layihəsinin növbəti qonağı “APA Holding”in rəhbəri Vüsalə Mahirqızıdır. 

Vüsalə xanım, fərqliliyiniz və fərdiliyiniz nədən ibarətdir? Nəyə görə Siz Sizsiniz?

- Özümü fərqli biri hesab eləmirəm. Normal, sıradan bir adamam. 

“Yanlışlar olmadan doğrular tapılmaz” - deyirlər. Uğursuzluq yanlışlardanmı doğar?

- Uğursuzluq iş bacarmamaqdan doğar. Hər yanlış uğursuzluq gətirməz, məncə. Amma yanlışlar toplusu yaransa, uğursuzluq qaçılmazdı.  

Apardığınız mübarizədə uğursuzluqlarla üzləşəndə nə edirsiniz?

- Mən mübarizə aparmıram. Sakit həyatımı yaşayıb, sevdiyim işlə məşğul oluram. Uğur olan yerdə uğursuzluq olmaz, aradabir çətinliklə üzləşmək isə mümkündür. Elə olanda çalışıram, daha çox işləyirəm və çətinliyi geridə qoyuram, hətta yeni uğurlar qazanıram. 

Hər insanda bir istedadın olduğunu söyləyərlər, bunu necə üzə çıxarmaq olar? 

- Adamlara şans tanımaq lazımdı, istedad ancaq yaranan şəraitdə üzə çıxa bilər. 

Sizcə, uğurun rəngi, dadı, qoxusu, səsi, görüntüsü necədir və ona toxunmaq nə zaman mümkündür?

- Adı üstündə, uğurdur. Adama yeni uğurlar üçün stimul verir. 

Bəs, insan oğlunun ən ali uğuru nədir? Ümumiyyətlə, bir insanın uğurlu olub-olmadığını necə müəyyənləşdirə bilərik?

- Hər zaman ləyaqətini qoruya bilmək, heç kimin hörmətsiz davranışına icazə verməmək, yaşadığın hər şeyə hörmətlə yanaşa bilmək, bacardığın və sevdiyin işlə məşğul olmaq. Ən ali uğur budu. 

Uğurumuzu uzun müddətli qoruyub saxlamaq üçün nə etməliyik?

- Çalışmaq və ardıcıl olmaq. 

Bəzi gənclər bir işə başlayanda “Düşün, tətbiq et və nəticələndir” prinsipini unudurlar. Yəni, onlar düşündüklərini ya tətbiq etmir, ya da nəticələndirmirlər. Bu problemlə üzləşənlərə nə söyləmək istərdiniz?

- Gəncliyin ən gözəl tərəfi  “gözüqaralığıdır”. Risklər həmişə lazımdı. Amma öz təcrübəmi deyə bilərəm ki, mən uğuruna inanmadığım heç bir layihəyə qoşulmuram. Ətrafda məni tanıyanlar “bu səndə alınacaq” desələr də, əgər özüm o layihənin uğuruna əmin deyiləmsə, o layihənin inkişaf yolunu, bütün inkişaf pillələrini, hətta zirvəsini belə görmürəmsə, mən o layihəyə heç vaxt qoşulmaram. 

Qarşısındakına “əhəmiyyətlisən” mesajını verməkdə çətinlik çəkənlərə nə söyləmək istərdiniz?

- Məncə, bu da bir istedaddır. İnandırmaq qabiliyyətinin özü bir istedaddır. İstedad isə ya var, ya da yoxdur. 

Övladlarınızın gələcəkdə uğurlu ola bilməsi üçün nə edirsiniz? Daha fərqli davrana bilirsiniz?

- Mənim bir qızım var. Onun imkanlarım daxilində yaxşı təhsil almasına, azad, amma intizamlı böyüməsinə, fərqli mədəniyyətlər görməsinə, yaşına uyğun məsələlərdə öz fikrini söyləməsinə çalışıram, ona uyğun mövzularda diskussiyalar edirik. 

Sizcə, uğura götürən yolda insanların ən güclü silahı nədir?

- İşlərini bacarmaları və ardıcıllıqları. Öz işinin peşəkarı olmaq hələ uğur üçün yetərli deyil, məncə. Uğurun şərtlərindən biri peşəkarlıqdısa, digərləri də ardıcıllıq, məsuliyyətlilik, özünə və ətrafına sayğı göstərə bilmək, səbirli olmağı bacarmaq, iddialarını imkanları ilə uzlaşdıra bilməkdir. 

Uğurun yaşı olur yoxsa başı, nə düşünürsünüz? 

- Uğurun özü olur. 

Bəs, Sizcə, uğurun başlanğıcı və sonu varmı?

- Uğur həyatın süjet xəttidir. Epizodik uğur olmur. 

İnanmaq asandır, yoxsa inandırmaq? 

- İnandırmaq üçün əvvəl özünə inanmaq, inandıracağına inanmaq lazımdı. 

Həyatın enini və uzununu ölçdünüzmü heç, yaşamı üzün edən nədir? 

- Mənim ona yaşım çatmır hələ.

Əgər Sizə dünyada yalnız bir şeyi dəyişdirmək imkanı verilsəydi, nəyi dəyişdirərdiniz?

- Dünyanı dəyişməyə iddialı deyiləm. 

Həyat toplananlar, çıxılanlar, vurulanlar və bölünənlərdən ibarətdir deyirlər, Sizin payınıza ən çox hansı əməl düşüb?

- Həyatdır bu, riyaziyyat qrafalarında yaşanmaz. 

Siz özünüz özünüzə dost ola bilsəydiniz, özünüzə Sizin kimi bir dost istərdinizmi? 

- Mən elə hamıya dostlarım kimi dost arzulayıram. Çünki deyirlər, dostunu göstər, sənin kim olduğunu deyim. 

Dəlinin doğru xəbəri nə olar? Dəliliyin gözəlliyi mümkünmü? 

- İşdə, peşəkarlıq tələb olunan yerdə dəliliyi qəbul etmirəm. Amma bəzən ən ciddi, ən çox displinlə yaşayan adamlar da çılğınlıq eləmək istəyir. Normaldır, bu da bir insanlıq halıdır. Yaxın adamlara, ərk etdiyin dostlara aradabir dəlilik eləməkdə, məncə, günah yoxdur.    

Hesab - kitab dəftəriniz var?

- Yox. Ədalət dəftəri açıq olan bir İlahi qüvvənin olduğuna inanan adamın özü hesab-kitab dəftərinə vaxt ayırmaz. 

Təbliğ etdiyiniz gerçəklər hansılardı, necə düşünürsünüz sevginin təbliğata ehtiyacı varmı? 

- Bütün ali hissləri təbliğ eləmək pis olmaz. Elə sevgini də. 

Yaşamaq və var olmaq arasında fərq nədir?

- Bizim dilimizdə belə deyimlərin fərqli mənaları olur: Bir anlamda hamı dünyaya gəlir, var olur, amma yaşamır. Başqa bir anlamda, hamı dünyaya gəlir, yaşayır, amma şəxsiyyət kimi var ola bilmir. 

Sizcə, gözlərimizin sürəkli tavana baxması tavanın nə işinə yarayar?

- Tavana bir şey olmaz, amma gözləriniz yorular.  

Deyir, getmə gəl. O-na doğru gəl. Getməkmi, gəlməkmi? Hansını seçərdiniz?

- Belə fəlsəfəni həyat tərzinə çevirmirəm.  

Çox zaman ölüm üçün yaşadığımızın da fərqinə varmırıq. Məsələn, Cənnəti istəsək də kimsə ölümü istəmir. Sizə elə gəlirmi ki, arzularımız da belədir – onları istəyirik, amma uğrunda heç nə etmirik?

- Mən şəxsən ölüm üçün yaşamıram. Ölüm də doğulmaq kimi bioloji prosesdir. Bunu biz yönəltmirik. Bizim ixtiyarımızda olan yaşamaq hissəsidir. O hissəni maraqlı və dolu yaşamalıyıq. Mən həyatımın əsas hissəsini arzularımı gerçəkləşdirməyə sərf etmişəm. 

Son olaraq uğurlu olmaq istəyənlərə ən gərəkli məsləhətiniz nədir?

- Mənim üçün uğurun formulu budur: özünə inanmaq, bacardığın işlə məşğul olmaq, ətrafındakılara sayğı göstərmək, məsuliyyət hissini itirməmək. 

Cəfər Mənsimi.azadinform.az