Hər bir gəncin həyatda qazandığı nailiyyət yalnız onun "uğur hekayəsi” deyil. Bu, həm də bir örnək kimi təbliğ olunmalı, digər gənclər üçün motivasiya nümunəsi kimi səciyyələnməlidir. Bu gün qürur hissi ilə demək olar ki, Azərbaycanda "uğur hekayəsi”nin müəllifi olan yetərincə gənc var. Bu uğur isə istənilən sahədən əldə edilir. Yetər ki, istək və bunun uğrunda məqsədə çatmaq üçün mübarizə olsun.
Bu tip gənclərdən biri də ictimai fəallığı ilə daim diqqət çəkən Ramiz Əliyevdir. İxtisasca jurnalist olan həmsöhbətim 16 yaşında Sumqayıt şəhərindən ən fəal gənc kimi UNİCEF-in yeniyetmə və gənclər proqramına cəlb edilib. Könüllü əsaslarla qurumun Sumqayıtdakı Resurs Mərkəzinin rəhbəri olub. Fəaliyyəti çərçivəsində 50-dən çox yerli və beynəlxalq layihələrin müəllifi olub. O, fəal gənc kimi hər zaman öyrənib və məqsədi qazandığı təccürübəni həmyaşdları ilə bölümək olub. Otuzdan çox ölkədə təşkil edilən 80-dən çox tədbirdə Azərbaycanı iştirakçı, təlimçi və ekspert qismində təmsil edib. Digər müsahibim isə idman sahəsində uğurlarını sıralayan İslam Abbasovdur. Səkkiz yaşından güləş idman növü üzrə məşğul olmağa başlayan İslam artıq peşəkar bir idmançıya çevrilib. 14 ildir güləşin sirlərini öyrənir. Gənclər və yeniyetmələr arasında dünya və Avropa çempionu, böyüklər arasında Dünya kubokunun sahibi olan İslamın arzuları bununla da bitmir. İslam deyir ki, fərqi yoxdur kim hansı peşənin sahibidir. Əsas insan özünə inanmalıdır, çünki bu inam adamı rahatlaşdırır və qələbəyə doğru daha israrlı addım atmağa sövq edir. İslam qələbə qazananda, bayrağımızı dalğalandıranda böyük sevinc və qürur hissi keçirdiyini deyir. Elə özünün qeyd etdiyi kimi bu da hər idmançıya nəsib olmur. Gənclər şəhəri olan Sumqayıtda bu iki qəhrəman tək deyil. Çəkə bildiyimiz bunlar idi. Onun kimi bacarıqlı gənclər indi ölkəmizin hər diyarında var. Ümumiyyətlə Azərbaycan gəncliyi ilk növbədə özləri öz potensial imkanlarını ortaya qoymağı bacarmalıdırlar. Belə olan halda yüksək nailiyyətlər əldə etmək mümkündür. Gənclərin də üzərinə düşən əsas məsuliyyət bu imkanlardan maksimum yararlanıb qazandıqları dünya təcrübəsini dövlətimizin inkişafı üçün tətbiq etməkləridir. Bu gün ölkədə 250-ə yaxın gənclər təşkilatı var. Bu da dövlətimizin gənclərə verdiyi dəyərdən, göstərdiyi qayğıdan xəbər verir. Bunun da sayəsində bu gün ölkəmizi təmsil edən savadlı, diplomatik bacarığa malik, dövlətçiliyə sadiq, yüksək intellektual potensialı olan gənclərimiz var. Amma bu son olmamalıdır...
Gəncliyiniz mübarək gənc dövlətin cəngavərləri !
Xəbərdən istifadə edərkən istinad etmək vacibdir.
