Tanınmış
jurnalist Aida Eyvazlı xeberle.com-a aprel döyüşlərinə həsr olunan və bu
yaxınlarda nəşr olunacaq kitabı ilə bağlı müsahibə verib. Aida xanım söhbətə bu
sözlərlə başladı: "Çox narahatam. Çox nigaranam. Son vaxtlar cəbhədə yenə
döyüşlər baş verir. Yenə şəhidlərimizin olduğu haqqında xəbərlər alırıq. Yenə
qalibiyyət olsun. Yenə hansısa torpağımızın alındığı haqqında xəbərlər eşidək”.
Aida xanım, məlumdur ki, ötən il Azərbaycanda
baş verən aprel döyüşləri haqqında kitab
yazmağa başlamısınız. Necə oldu ki, bu haqda kitab yazmaq qərarına gəldiniz?
-
Biz bu qələbə xəbərini 25 ildir gözləyirik.
Ona görə bu kitabı yazmaq qərarına gəldim. Deyə bilərsiniz ki, niyə məhz aprel şəhidləri
haqqında yazırsınız, axı Azərbaycanda bundan əvvəl də şəhidlər olub və onlar da
vətən uğrunda şücaət göstəriblər.Ümumiyyətlə hamı bilir ki, mən 168 saat qəzetində
işlədiyim vaxtlarda da Sumqayıtın şəhidlər xiyabanına baş çəkərək oradan
reportajlar hazırlamışam və həmişə vətənimizin övladları ilə, şəhidlərimizlə
qürur duymuşam, onlara aid yazılar yazmışam. Lakin kitab yazmağa çəkinirdim, bəlkə
yaxşı qarşılanmaz, oxunmaz deyə.Amma bu son qələbə məni çox qürurlandırdı və
kitab yazmağa vadar etdi. Doğrudur, onlar da vətən uğrunda vuruşublar, onlar da
bir neçə torpaqların alınmasında iştirak ediblər. Lakin şər qüvvələrin təsiri nəticəsində bu
torpaqları əlimizdə saxlamaq mümkün olmayıb. Siz gedib o Lələtəpəni görsəniz
bilərsiniz ki, oranı almaq elə-belə şey deyil. Hətta bir ovuc torpaq belə
alınırsa o da qələbədir.
Kitabın
ümumi məzmunu haqqında məlumat verərdiniz.
- Kitab həm aprel şəhidlərinə, həm də şahidlərə həsr olunub. Aprel hadisələri bizim hamımızı
çox kədərləndirdi. İlk günlər dedilər ki, 33 nəfər şəhid olub. Çox məyus oldum
və şəhidlərin ailələrinə baş çəkmək qərarına
gəldim. İlk olaraq Şamaxı rayonunun Çuxuryurd kəndindən olan və evin tək oğlu Samir
Kaçayevin ailəsinə baş çəkdim.Sonra şəhidlərin sayının 60-a çatdığını dedilər.Onların
hər birinin ailəsinə baş çəkib onlar haqqında məlumat toplamağa başladım. Cənab
prezident də dəfələrlə öz çıxışlarında deyib ki, aprel döyüşlərini unutmaq
olmaz,döyüşçülərin qəhrəmanlığından yazmaq lazımdır və sevinirəm ki, hətta
prezident bunu elan etməmişdən qabaq mən buna başladım və dövlətimizin tutduğu
xətti tuturam. Aprel döyüşlərinin unudulmamasında mənim də imzam olacağı üçün
özümü xoşbəxt sayıram.
Kitabınızın adı necə olacaq?
Çox güman ki, kitabın adı "Qalibiyyət, şəhidlər və şahidlər” olacaq. Hələ
ki, kitaba bu adı verməyi düşünürəm.
Kitabı yazmağa nə vaxtdan başlamısınız və nə zaman oxuculara təqdim olunacaq?
- Kitabı
ötən ilin aprel ayının 11-dən yazmağa başlamışam və ehtimal ki, aprel ayının əvvəllərində kitab
artıq hazır olacaq.
Aida
xanım sözlərini belə bitirdi: "Torpaqlarımızın işğal olunduğu ilk vaxtlarda mən
xarici ölkədə jurnalist kimi fəaliyyət göstərərkən mənə sual verəndə ki, torpaqlarınzı nə vaxt alacaqsınız,
çox utanırdım. Beynəlxalq konfranslarda və xarici ölkələrdəki digər tədbirlərdə
erməni fəxrlə yellənə-yellənə qabağımdan keçəndə çox pis olurdum. Amma aprel
döyüşləri mənə qürur gətirdi.Hara gedirəmsə artıq qələbəmizdən danışa bilirəm və
deyə bilirəm ki, biz döyüşməyi bacarırıq, biz irəli gedə bilirik. Lakin beynəlxalq
qanunlar, beynəlxalq normalar bizi qoymur irəli getməyə.Yoxsa biz bir günün içərisində torpaqlarımızı ala bilərik. Artıq bütün dünya
bildi ki, biz nəyə qadirik, biz nələr edə bilərik və biz bu yolda ölməyə belə
hazırıq”.
ELNARƏ SALAMOVA
Xəbərdən istifadə edərkən istinad etmək vacibdir.