Mən deyəndə ki, sürücülük kursları Mədəniyyət və İncəsənət Universitetinin tərkibində fəaliyyət göstərməlidir, çoxu bu təklifə ironiya və gülüşlə yanaşır. Bəlikə də haqlıdırlar. Amma yaşanan yol qəzaları çox vaxt sübut edir ki, yolda hoqqabazlıq edənlər, nəinki sürücülükdən, ümumiyyətlə, insanlıqdan, mərifətdən, mədəniyyətdən, ağıldan uzaq adamlardırlar. Ən yaxşı halda mikroavtobusu gül-çiçəklə bəzəyib, öz səviyyələrində mahnılara səs verib, hər gün yüzlərlə sərnişini "kartof kisəsi daşıyırmış" kimi o baş bu başa aparırlar. Sərnişinlərin bəziləri abrından, çoxu isə laqeydlikdən sürücüyə bir kəlimə də demir. Səsini çıxaran olanda isə həmən o, səviyyəsiz, tərbiyə görməyən sürücü elə xoruzlanır ki, sanki hamı buna bir təşəkkür etməlidir ki, sağ ol bizi daşıyırsan (kartof kisəsi kimi).
Bir dəfə 7-8-il bundan öncə 207 (keçmiş) nömrəli marşurut avtobusun sürücüsünə "niyə tez-tez siqnal verirsən, onsuz da qırmızı işıqdır, qarşıdakı hərəkət edə bilməyəcək", - deyə irad bildirdim. Sürücü dedi ki, bilirsən nə var? Xoşun gəlmir düş piyada get... Bunu dediyinə sürücünü sözün əsl mənasında peşman etdim. Üstünə gedərək deyil, təmkinimi pozmadan "Gənclik” metrosundan "Elmlər Akademiyası”na kimi olan məsafədə sürücü qışqırdıqca ona səhv hərəkət etdiyini başa salmağa çalışdım. İnanın axırda o, üzr istədi. Və ardıcıl siqnallarını şəxsi problemləri səbəbindən əsəbi olması ilə əlaqələndirdi.
Daha bir hadisə.... Hövsan yolu ilə şəxsi avtomobilimdə gedirdim. Arxamda yaşıl rəngdə olan nəhəng marşrut avtobusu (175 nömrəli) siqnal verir, uzaqvuran işıqlarını yandırırdı. Halbuki, dəniz havası olduğundan yolda avtomobillər çox idi. Uzun bir kalon yaranmışdı. Qarşı tərəfdə də eyni vəziyyət idi. Avtobusun yekəxana sürücüsü 30-dan artıq sərnişin daşımasına, yolun dar olmasına baxmayaraq ötmə əməliyyatı etdi və yolda bir neçə avtomobil kənara yuvarlanmaqdan son anda qurtuldu. Avtobusun sürücüsü qarşıda sərnişin düşürtməli oldu. Mən önə keçdim. Və qarşıda yol kənarında dayanan DYP əməkdaşlarını görüb, onlara "yol canavarı” haqqında operativ məlumat verdim. Sağolsunlar, avtobusu dayandırdılar. Məlum oldu ki, sükan arxasında əyləşən bu varlığın heç sürücülük vəsiqəsi də yoxdur. Mən bu şəxsi ifşa eləməyimə sevindiyim anda avtobusdan bir neçə nəfər düşüb, məni o ki var "tərifləməyə" başladılar. Daha doğrusu, qınamağa: "Sənin nə işinə qalıb, biz tələsirik, sən burda bizi ləngidirsən. İşin gücün yoxdur?....."
Və bu gün belə məsuliyyətsiz sürücü, laqeyd sərnişinlərin ucbatından formalaşan, daha da azğınlaşan özbaşına sürücü ordusu Bakı-Sumqayıt yolunda qəza edərək daha 5 gəncimizin və 5 ailənin arzularını yarıda qoydu. Mədəniyyətsiz, normal dünyagörüşü, məsuliyyət hissi olmayan sürücülər nə vaxta kimi bizi mənzil başına yox, məzar başına daşıyacaq?...
Elnur Niftəliyev
Xeberle.com
Xəbərdən istifadə edərkən istinad etmək vacibdir.
