Günümüzdə qadın bir sıra rola malikdir. İstər ailədə, istərsə də iş həyatında. Üstəlik, ilk olaraq uşaqların təlim-tərbiyəsi, təhsilinə də cavabdeh olan odur. Bu qədər məsuliyyətli işlərin öhdəsindən gəlməyi bacaran bir xanım özünə fikir verməli, formada və gözəl qalmalıdır. Əlbəttə, hər bir qadın baxımlı və gözəl görünmək arzusundadır. Axı bunu kim istəməz?! Belə bir deyim var "Çirkin qadın yoxdur. Baxımsız qadın var”. Bu deyimdə bir həqiqət var. Baxımlı xanım hər yerdə öz görkəmi, səliqəsi ilə seçilir. Deməli, baxımlı olmaq – həm də qadının ətrafdakılardan müsbət mənada seçilməsi və yadda qalması deməkdir.Bunun üçün qadınlar hər gün görkəmlərinə diqqət etməli, müraciət edəcəkləri ünvanı düzgün seçməklə onları narahat edən problemləri bir növ aradan qaldırmalıdırlar. Xeberle.com bu dəfə sırf xanımları nəzərə alaraq "Unikal klinika"nın dermatokosmetoloqu Aynur Babayeva ilə müsahibə alıb. Onunla bu mövzuda bir sıra məqama toxunduq.

 

HAŞİYƏ: Aynur Babayeva, dermatokosmetoloq. 1981-ci ildə Sumqayıt şəhərində anadan olub. 1998-2006-ci illərdə Azərbaycan Tibb Universitetində müalicə profilaktika fakültəsini bitirib. Türkiyədə (İstanbul AQA ACADEMI) və 2009-cu il də Rusiyada (Moskva) həkimlərin təkmilləşdirilməsi kafedrasında (Российский Университет Дружбы Народов Переквалификация Врачей) həkim dermatokosmetoloq, aparat kosmetologiyası, mezoterepiya, botulınoterapiya, kontur plastika və iplər üzrə 6 aylıq kurs keçib. Sumqayıt və Bakı şəhər klinikalarında dermatikosmetoloq kimi fəaliyyət göstərir. Hazırda "Unikal klinika"da çalışır.

 

- Aynur xanım, istərdik öncə xanımlarımızı üz dərisinə qulluq barəsində məlumatlandırasınız.

- Hər bir xanımbaxımlı olmalıdır. Xanımın siması nə qədər baxımlı olarsa, bir o qədər də cavan və gözəl görünmüş olar. Bu, elə də çətin deyil. Sadəcə düzgün qidalanmalı və orqanizmimizi lazımi vitaminlərlə zənginləşdirməliyik. Deyərdim ki, bir çox qadın dərilərinə yaşlaşandan sonra qulluq etməyə başlayır. Lakin bu, səhv yanaşmadır. Çünki dəriyə 20-25 yaşlarından başlayaraq qulluq edilməldir. İnsanın dərisi hər zaman qulluq tələb edir. Və hər bir qadın da ilk növbədə üz dərisinin hansı tipə aid olduğunu bilməlidir. Bu, ilk vacib olan bir şərtdir. Çünki hər bir qadın üz dərisinə uyğun maskalardan istifadə etməlidir, əks halda problemlər yarana bilər. Üz dərisi ayda bir dəfə mütləq şəkildə təmizlənməlidir və dəriyə qulluq olunmalıdır. Bunun üçün klinikamızda mezo terepiya, batumi terapiya, konturna plastika, ulturasəs, lokal piylərin əridilməsi, üz dərisinin maskalarla qulluğu və s. kimi prosedurlar həyata keçirilir. Nəzərə alsaq ki, gündəlik yorğun iş rejimi, stress, sıxıntılar üz dərisinin rənginin dəyişməsinə təsir edir. Bunun üçün də xanımlara ayda bir dəfə üz dərilərinin heç olmasa pilinq proseduru ilə təmizlənməsini məsləhət görürəm.

- Üz dərisinin pilinqi nə üçün lazımdır? Onun köməyilə hansı problemlərdən azad olmaq mümkündür?

- Ümumiyyətlə, "pilinq” sözü – "qabıq vermək” kimi tərcümə olunduğuna görə, dərinin təmizlənməsi deməkdir. Daha dəqiq, pilinq dərinin ölmüş hüceyrələrdən təmizlənməsi üçün edilən prosedurdur. Dəridə yaranan ölü hüceyrələr o qədər kiçik ölçülü olur ki, biz onları gözlə görə bilməsək də, az sonra fəasadları özünü göstərir. Və onlar təmizlənmədikdə, dəridə məsamələrin tutulması baş verir, bu da dərini nəfəs almağa imkan vermir, nəticədə dəri qalın və kobud olur, dərinin rəngi dəyişərək xəstə və solğun görkəmi alır. Bu prosedurla isə dərinin teksturası yaxşılaşır, dərinin artıq yağı azalır, məsamələr təmizlənir və daralır. Bununla da dəri hamar, elastik və yumşaq olur. Deməli, bu, o deməkdir ki, təkcə problemli dərisi olan xanımlar deyil, üz dərisi sağlam olan xanımlar da dəri hüceyrələrinin yenilənməsi üçün ayda bir dəfə bu proseduru vacib şəkildə etməlidirlər.Əgər bizə müraciət edən pasiyentin üz dərisi problemlidirsə, o zaman 1-2 həftə onu daxilə qəbul ediləcək dərmanlarla müalicə etdikdən sonra üzün təmizlənməsi prosesi həyata keçirilir.

 

- Hazırda Sumqayıtda yaşayan xanımlar sizə daha çox hansı problemlərlə əlaqədar üz tuturlar?

- Bu gün klinikamıza gələn əksər xanımlar, deyərdim, 10 pasiyentdən 9-u üz dərisində yaranmış civzələr və ya sızanaqlarla (akne) bağlı müraciət edirlər. İstər gənc, istərsə də orta yaşlı xanımları akne daha çox narahat edir. Ümumiyyətlə istərdim əvvəlcə akne barədə xanımları məlumatlandırım. Akne - tük follikulları və onunla yanaşı yerləşən piy vəzilərinin iltihablaşmasıdır. Follikullar dəri piyindən əmələ gələn sıx "tıxac" ilə qapanmış olur. Aknelər müxtəlif olur. Follikullar açıq olduqda tıxaclar üz dərisində qara nöqtə kimi görünür və açıq komedonlar adlanır. Lakin komedonlar bağlı da olur. Belə komedonlar ağ civzələr adlanır. Komedonlar bağlı olduğu üçün piy dərinin səthinə çıxa bilmir və nəticədə piy şişi əmələ gəlir. Ümumiyyətlə komedon və civzələr iltihablaşdıqda üz dərisində irinli civzələr yaranmış olur. Və bəzən xanımlar civzələri sıxmaqla bundan canlarının qurtaracağını düşünürlər. Təəssüf hissi ilə deyə bilərəm ki, bunu nəinki xanımlar, hətta bəzi "kosmetoloqlar" da edirlər. Lakin bu, səhv bir addımdır. Məhz bu, dəridə sızanaqların yayılmasına və çapıqların qalmasına səbəb olur. Aknenin müalicəsi bir qədər uzun müddət aparır, deyərdim, hardasa 4-6 aya kimi davam edə bilər. Dəri həmin an daha çox həssas olur. Və ona görə də ona düzgün qulluq olunmalıdır. Çox zaman dərisi sızanaqlı olan xanımlar çıxış yolunu üzlərini tez-tez yumaqda görürlər. Lakin bu da yanlış üsuldur. Üz dərisini sabunla tez-tez yumaqla və yaxud da kosmetik vasitələr istifadə etməklə (tonal krem, krem-pudra) problemi aradan qaldırmaq mümkün deyil. Bu zaman tonal krem, pudra, toz və tərin bir-birinə qarışması nəticəsində dəridəki məsamələr daha artıq dərəcədə qapanmış olur. Nəticədə dəridə sızanaqlar və kamedonların sayı da artır.

 

- Aknenin dəridə yaranma səbəbləri hansılardır?

- Aknenin yaranma səbəbləri çoxdur. Öncə deyərdim ki, bunun başında hormonol pozğunluq dayanır. Bu problem nəinki xanımların həyat tərzini dəyişir, hətta, bədəndə bir çox xəstəliyin yaranmasına güclü təsir edir. Bildiyimiz kimi, hormonol problemlər yuxarı yaşlı xanımlarda da baş verdiyi hallarda, onların da dərisində sızanaqlar yaranmış olur. Onu da qeyd edim ki, klinikamıza sızanaqlarla bağlı üz tutan xanımlarla ilk işim onların hormonol problemlərinin olub olmamasını yoxlamaq olur. Əksər kosmetoloqlar bunun yaranma səbəblərini çox zaman qurd, gənə və mədə-bağırsaq problemləri ilə əlaqələndirir. Ancaq mən bununla heç də razı deyiləm. İlk öncə xanımın hormonol pozğunluğu yoxlanılmalıdır. Nəzərə almalıyıq ki, hormonol pozğunluq insanın bütünlükdə vücudunda dəyişiklik yaradır. Dəridə sızanaqların daha da artmasına düzgün qidalanmamaq, düzgün həyat tərzinin olmaması, üzə qulluq vasitələrinin düzgün seçilməməsi və s. təsir edir. Bunun üçün də xanımlar dərilərini təmizləmə məqsədi ilə seçdikləri məhsullara daha ehtiyatla yanaşmalıdırlar. Xanımlara toniklərdən istifadə etmələrini məsləhət görürəm. Çünki tonikdən istifadə dərini daha çox rahatlandırır. Və problemli dərisi olan xanımlar da unutmamalıdır ki, vaxtında və düzgün edilən müraciət, problemin vaxtında düzgün həlli deməkdir.

 

- Aynur xanım, qadınların cavanlaşmaq üçün etdiyi botoks üsuluna müraciət hansı yaş həddində başlanılmalıdır?

- Hal-hazırda boteks ineksiyaları ən populyar və tələb olunan kosmetoloji prosesdir. Onu deyim ki, gənclərin botoksa erkən üstünlük vermələrinin əleyhinəyəm. O, hardasa müəyyən yaşdan sonra ediləcək prosedurdur. Yəni dəridə artıq qırışlar, gözaltı kölgələr və s. kimi hallar yaranmağa başladıqda edilməsi məqsədəuyğundur. Ümumiyyətlə, bilirik ki, üz dərisi insanın bütün keçirdiyi emosiyaları özündə əks etdirir. Və üz dərisində mimiki əzələlər daha aktiv olur. Bu zaman mimiki əzələlərin tez-tez yığılıb boşalması dəri zonaların genişlənməsinə səbəb olur, bu da öz növbəsində qırışların yaranması ilə nəticələnir. Üzdə qırışlar tədricən - yaş artdıqca müşahidə olunur və bu zaman dərinin elastikliyi azalır, qadınların sevmədiyi qırışlar əmələ gəlir. Hansı ki bu qırışlar alın, göz ətrafındakı sahə, burun-dodaq qırışları və boyun sahəsini daha çox əhatə edir. Botoks və dolğu üsulu ilə mimiki aktivlik azalır, qırış və qatlar itir, dəri hamarlaşır. Deyərdim ki, burda elə də pis heç nə yoxdur. İstəsək də, istəməsək də xanımlarda müəyyən yaş həddindən sonra buna ehtiyac yaranır.

 

- Botoks dəriyə yeridildikdən sonra ona vərdişlik yaranırmı və ya bunun əks-təsirləri varmı?

- Xeyr, bu, yanlış bir mifdir. Botoksun təsiri keçdikdən sonra belə qırışların daha da artması və pisləşməsi, habelə ona vərdişin yaranması belə mümkün deyil. Əslində, mən xanımlara məsləhət verərdim ki, botoksu üz dərilərində qırış tam oturmadıqda, yəni dərin bir qırış halına gəlmədikdə etdirmələri daha faydalıdır. Çünki dəridə yaranan qırış qatları artdıqda, üzdə dərin bir iz yaratdıqda onu botoksla belə aradan qaldırmaq mümkün olmaya bilər. Bu baxımdan qırış üzdə tam oturmadan botoksla onu əngəlləmək daha yaxşı nəticə verə bilər. Botoksdan ildə iki dəfə istifadə etmək olar. Onun fəsadı yalnız prosedur qeyri-peşəkarlar tərəfindən düzgün aparılmadıqda yarana bilər. Buna görə də biz dermatokosmetoloqlar marketinq tərəfi deyil, bizə üz tutan pasiyentin problemini aradan qaldırmağı ön plana çəkməliyik. Deyərdim mənim tutduğum yol budur.

- Bir xanım olaraq sonda zərif cinsin nümayəndələrinə nələri məsləhət görərdiniz?

- Xanımlara daim baxımlı olmalarını, özlərinə diqqəti, düzgün qulluğu əsigəməmələrini və daha təbii kosmetik vasitələrdən istifadəni məsləhət görürəm.
Söhbətləşdi: Fərqanə Abdulova
Xeberle.com

 

 

 

Xəbərdən istifadə edərkən istinad etmək vacibdir.