Məlumdur ki, Azərbaycan iqtisadiyyatının əsasını neft sənayesi təşkil edir. Lakin  son illər ölkəmizdə qeyri-neft sektorunun ümumi çəkisi də neft sənayesinə paralel olaraq  inkşaf etdirilməkdədir. Dünyanın əksər ölkələrində qeyri-neft sənayesini inkişaf etdirən əsas gəlir qaynağı kimi turizmi xüsusilə qeyd etmək lazımdır. Turizm sürətlə inkişaf edən və ölkəyə ən çox iqtisadi gəlir gətirən sektorlardan biridir. Buna görə də inkişaf  etmiş və inkişaf  etməkdə olan ölkələr turizm fəaliyyətinə  böyük əhəmiyyət verirlər.  Bu sektorun bir çox fəaliyyət sahələri ilə yaxın əlaqədə olduğu üçün ordan gələn gəlirlər də digərlərinə nisbətən iqtisadiyyata daha müsbət təsir göstərməkdədir. Bəs görəsən doğma şəhərimiz Sumqayıtda bu istiqamətdə hansı addımlar atılır? Ümumiyyətlə Sumqayıta necə turist cəlb etmək olar? Xeberle.com olaraq turizmin əhəmiyyəti, həmçinin şəhərimizə turist cəlb etməyin yolları haqqında ekspertlərin fikirlərini  öyrəndik.
  Sumqayıt şəhər Regional Mədəniyyət və Turizim İdarəsinin rəisi Mehman Şükürov: "Turizm ölkəni tanıtmaq üçün çox vacibdir. Çünki əgər bir ölkədə turizm inkişaf edirsə deməli bu ölkə çox tanınıb ki, oraya digər dövlətlərdən gəlirlər. Elə dövlətlər var ki, onlar ancaq turizmin hesabına yaşayırlar. Azərbaycanın bütün bölgələrində turizm üçün əhəmiyyətli yerlər var və bu səbəbdən getdikcə ölkəmizə tursitlərin axını artmaqdadır.  Sumqayıtda bu sahənin inkişafına gəldikdə isə ilk növbədə qeyd etmək lazımdır ki, bura gənc şəhərdir. Sumqayıtın elə böyük yaşı yoxdur, tarixi yerləri azdır. Lakin buna baxmayaraq burada turizmin inkişafı istiqamətində bir sıra tədbirlər görülüb, dənizkənarı bulvar salınıb, şəhərimiz abadlaşdırılıb. Corat qəsəbəsində bir sıra mühüm abidələr var ki, onlar artıq turistlər üçün plana salınıb və biz ikimərtəbəli avtobus təşkil etmişik ki, gələn qonaqlara onları nümayiş etdirə bilək. Həmçinin Sumqayıt sənaye şəhəri olduğu üçün biz burada sənaye turziminə yol açmağı düşünürük və bununla da qonaqlar təkcə dənizimizlə, bulvarımızla, Coratımızla deyil,eyni zamanda  sənayemizlə də tanış olacaqlar.  Onu da qeyd edim ki, yaxın gələcəkdə dənizkənarı bulvarda gəmilərin fəaliyyət göstərməsinin təşkili də şəhərimizə turistlərin axını baxımından müsbət təsir göstərəcək. Bundan başqa bu il Sumqayıtda balıqqulağı və Corat qutabı festivallarını  keçirməyi nəzərdə tutmuşuq. Balıqqulağı festivalında biz ondan hazırlanan suvenirlərin sərgilənməsini həyata keçirəcəyik. Bu festival üçün artıq cənab nazirimiz Əbülfəz Qarayev, icra başçımız Zakir Fərəcov da öz razılıqlarını bildiriblər. Corat qutabı festivalını keçirməkdə əsas məqsədimiz isə  onu brendləşdirməkdir. Bu festivalların əhəmiyyətinə gəldikdə  onu deyə bilərəm ki, burada yalnız biz deyil, bir çox mətbuat nümayəndələri və başqa qonaqlar da iştirak edəcək və bu da şəhərimizin tanıdılmasında böyük rol oynayacaq. İnsanların mədəni səviyyəsinin yüksəlməsində festivalların, tədbirlərin, konsertlərin   keçirilməsi böyük rol oynayır. Bunun görə də bu istiqamətdə bir sıra tədbirlər həyata keçirmək zəruridir. Keçən il şəhərimizə gələn qonaqlar üçün otelimiz yox idi. Artıq bilirsiniz ki, Sumqayıt plaza oteli tikilib və ayın 14-ü onun açılış mərasimi olacaq. Açılış mərasimi olmasa da bu bayramda onun kirayələnmək üçün olan 88 otağının hamısı dolmuşdu. Bununla da demək olar ki, artıq bu ildən   şəhərimizə turist axını başlayıb . Zakir Fərəcovun tapşırığı əsasında dənizkənarı bulvarda da yeni otellər tikilir.  Bu yaxınlarda mən turizm sərgisində şəxsən cənab prezidentlə görüşdüm, ona Sumqayıt haqqında məlumat verdim və o, mənə dedi ki, Sumqayıt qısa bir müddətdə nəhəng turizm şəhərinə çevriləcək”.
Millət vəkili Tahir Mirkişili: Turizmin bir çox istiqamətləri var. Hər bir istiqamət üzrə isə spesifik turist axını var. Sumqayıt şəhərinin müasir tarixi, sənayeləşmə ilə bağlı olması, dəniz kənarında yerləşməsi, mədəniyyət və idman sahəsində uğurları fikrimcə turistlərin cəlb edilməsi üçün yetərlidir. Xəzər dənizinin sahilində cəlbedici bulvarın salınması, şəhərin mədəniyyət ocaqlarının yenidən qurulması müxtəlif festivalların keçirilməsi üçün imkan yaratmışdır. Eyni zamanda Sumqayıt şəhərində daha əvvəllər də mövcud olmuş müalicəvi sanatoriyaların olması onları bərpa edərək müalicəvi turizm axınını cəlb etmək mümkündür. Turistləri cəlb etmək üçün 2 əsas iş tələb olunur. 1. Şəhər infrastrukturunun qurulması. 2. Turistlərin cəlb olunması üçün məlumatlandırmanın aparılması. 1-ci istiqamətdə son 1 ildə şəhərdə xeyli işlər görülüb, bu işlər bu gün də davam edir. 2-ci istiqamət üzrə isə fikrimcə fəaliyyəti daha da gücləndirmək və əlavə innovativ üsüllardan istifadə etməyi artırmağa ehtiyac vardır. Ölkə miqyasında turslətin cəlb olunması üçün görülən işlər son 3 ayda turzm axınını 25% artırmışdır. Hesab edirəm ki, bu hal Sumqayıt şəhərinə də turistlərin axınını güclənməsinə təkan verəcəkdir.
Sülh Travel şirkətinin satış müdiri Aygül Hacıyeva: "Turizm artıq bütün dünyada ən gəlirli iqtisadi sahəyə çevrilib. Azərbaycanda qeyri-neft sektoru olaraq, turizm sahəsinin inkişafı ən prioritet məsələlərdən biridir. Azərbaycanın iqlimi, zəngin tarixi, qədim adət-ənənələri, coğrafi-mövqeyi turizmin inkişafı üçün çox əlverişlidir. İcra başçımız Zakir Fərəcovun Sumqayıtda  turizmin inkişafı üçün gördüyü işlər göz önündədr. Buna misal olaraq, Novxanı çimərliyinə qədər uzanan Sumqayıt Bulvarı, şəhərimizdə aparılan yenidenqurma işləri, açılan və tikilən yeni hotelləri misal göstərmək olar.Əminik ki,Sumqayıt turizmin inkişafına,turist sayına görə heç də paytaxt Bakıdan geri qalmayacaq”.
 

Xəbərdən istifadə edərkən istinad etmək vacibdir.