Sumqayıt şəhər sakini, Zəngilan rayonundan məcburi köçkün Vaqif Sadıqov Sumqayıt şəhər Qaz İstismar İdarəsi ilə bağlı Xeberle.com-a şikayət edib. Onun sözlərinə görə məskunlaşdığı körpələr evində quraşdırılan mexaniki sayğac smart-kart tipli sayğacla əvəz edilib və buna görə də o, hər ay qaz pulunu öz vəsaiti hesabına ödəmək məcburiyyətində qalıb. Vaqif Sadıqov bildirir ki, ölkə prezidentinin 2017-ci il 23 yanvar tarixli 1206 nömrəli fərmanı ilə fərdi qaydada sayğacların quraşdırılması və texniki istismarı mümkün olmayan sıx müvəqqəti məskunlaşma yerlərində (keçmiş yataqxana, müalicə pansionatları və digər binalarda) faktiki yaşayan məcburi köçkünlərin və onlara bərabər tutulan şəxslərin (fərdi qaydada təbii qazla təmin olunmayan sıx müvəqqəti məskunlaşma yerlərində faktiki yaşayan məcburi köçkünlər və onlara bərabər tutulan şəxslər istisna olmaqla) onlar fərdi qaydada sayğacların quraşdırılması və texniki istismarı mümkün olan yeni yaşayış sahələrinə köçürülənədək istifadə etdikləri təbii qaz, elektrik enerjisi, su və məişət tullantılarının daşınmasına görə haqların 2017-ci il 1 yanvar tarixinədək məcburi köçkünlər üçün müəyyən edilmiş normalar həddində dövlət hesabına mərkəzləşmiş qaydada ödənilməsi təmin olunması nəzərdə tutulub. Şikayətçi Prezidentin bu fərmanını əsas gətirərək sayğacı dəyişdirən işçilərə bu hərəkətlərinin qanunsuz olduğunu bildirsə də, səyləri heç bir nəticə verməyib. Smart-kart tipli sayğacın dəyişdirilərək mexaniki sayğacla əvəzlənməsi ilə bağlı dəfələrlə Qaçqınkoma və bu iş üzrə səlahiyyətli orqanlara müraciət edib və ona sayğacın dəyişdiriləcəyi bildirilib, lakin hələ də bunun üçün heç bir tədbir görülməyib.

 

Məsələ ilə bağlı Xeberle.com olaraq Sumqayıt şəhər Qaz İstismar İdarəsi ilə əlaqə saxladıq. İdarədən bizə bildirildi ki, bu məsələyə görə Vaqif Sadıqov tərəfindən onlara rəsmi olaraq heç bir şəkildə müraciət olunmayıb. Əgər idarəyə şikayətçi tərəfindən ərizə ilə və ya şəxsən müraciət olunsa bunun üçün əsaslı tədbirlər görüləcək.
Beləliklə, biz hər iki tərəfi dinləyərək məsələni araşdırdıq. Gerisi əlaqədar qurumların ixtiyarına...

Elnarə Salamova
Xeberle.com

Xəbərdən istifadə edərkən istinad etmək vacibdir.