Mayın 18-də Sumqayıtın Heydər Əliyev Mərkəzində Fövqəladə Hallar Nazirliyinin Sumqayıt Regional Mərkəzinin əməkdaşları ilə mətbuat nümayəndələri arasında "Fövqəladə hallarla bağlı əhalinin maarifləndirilməsində mətbuatın rolu" mövzusunda geniş diskussiya keçirilmişdir.
Tədbir başlamazdan əvvəl Heydər Əliyev Mərkəzinin direktoru Aygün Zülfüqarlı qonaqları salamlayaraq, onları Mərkəzin birinci mərtəbəsindəki geniş foyedə ulu öndərin həyat və fəaliyyətini əks etdirən tarixi foto-şəkillərlə, böyük həyatın ayrı-ayrı yüksəliş məqamlarına aid arxiv sənədləri ilə tanış etmiş, 34 illik hakimiyyəti dövründə Azərbaycanın inkişafı, dövlət müstəqilliyi əldə etdikdən sonra isə onun bütün dünyada tanınması və hərtərəfli tərəqqisi üçün gördüyü ölçüyəgəlməz, irimiqyaslı fəaliyyətindən danışmış, dahi rəhbərin başladığı işləri Prezident İlham Əliyevin böyük uğurla davam etdirməsindən söhbət açmışdır. 
Dəyirmi masa arxasında keçirilən görüşdətədbir iştirakçıları ilk olaraq Laçının işğalının 25 illiyini yada salaraq, Azərbaycan torpaqlarının azadlığı uğrunda həlak olmuş döyüşçülərin xatirəsini bir dəqiqəlik sükutla, ehtiramla yad etmişlər.
Sumqayıt şəhər İcra hakimiyyətinin nümayəndəsi Eyvaz Qocayev tədbiri açaraq qeyd etmişdir ki, iri sənaye müəssisələrinin, o cümlədən kimya zavodlarının yerləşdiyi Sumqayıt kimi böyük sənaye zonasında müxtəlif təhlükəli halların və yanğınların, digər istehsalat qəzalarının qarşısının alınmasında Sumqayıt Regional Fövqəladə Hallar Mərkəzinin böyük rolu vardır. O, təhlükəli hadisələrin başvermə hallarının minimuma endirilməsi məqsədilə əhalininbu sahədə maarifləndirilməsinin vacibliyini, bu mühüm təbliğat işində isə mətbuat və televiziyanın xüsusi rolu olduğunu qeyd etmişdir.
Məhz bu məqsədlə  FHN-nin Sumqayıt Regional Mərkəzi ilə mətbuat işçilərinin qarşılıqlı əməkdaşlığının təmin edilməsi, təhlükəli hallarda əhali, həmçinin istehsalat sahələrində çalışan işçilər arasında əsassız olaraq narahatlıq və həyəcan yaranmasına yol verilməməsi üçün müvafiq xəbərlərin obyektiv olaraq, düzgün vəsüni sensasiya yaratmadan çatdırılması məqsədilə belə bir tədbirin keçirilməsi mühüm hesab edilmişdir.
Regional Mərkəzin operativ məlumat İdarəsinin rəisi mayor Rafiq Həsənov ulu öndər Heydər Əliyevin belə bir fikrini diqqətə çatdırmışdır ki, "Bir hadisənin qarşısını almaq, o hadisə baş verəndən sonra onunnəticələrini aradan qaldırmaqdan daha asandır!".
R.Həsənov son zamanlar - Sumqayıta yeni İcra başçısı təyin edildikdən sonra mülki əhalinin və istehsalat sahələrində çalışanların təhlükəsizliyinin, qurğu və avadanlıqların yanğından və digər təhlükəli hallardan qorunmasının təmin edilməsinə diqqətin artırıldığını məmnunluqla qeyd etmişdir.
Mərkəzin İctimaiyyətlə əlaqə və təbliğat sektorunun baş məsləhətçisi Emin Ramazanovmətbuat nümayəndələrini qarşılıqlı əməkdaşlığı genişləndirməyə çağıraraq, qəzet və saytlarda əhalinin fövqəladə hallarla bağlı maarifləndirilməsi üçün bu sahədə təbliğat-təşviqat xarakterli yazılara daha geniş yer verməyin mühüm əhəmiyyət kəsb etdiyini bildirmişdir.
Tədbirdə iştirak edən mətbuat nümayəndələri - "Sumqayıt" qəzetinin baş redaktoru, respublikanın Əməkdar jurnalisti Qüdrət Məlikov, "Xalq qəzeti"nin və "Azərbaycan" qəzetinin Sumqayıt üzrə bölgə müxbirləri Əli Nəcəfxanlı və Akif İsmayıl, "Xeberle.com" saytının həmtəsisçisi Kamal Almuradlı və digərləri çıxış edərək, birneçə il əvvəl şəhərin "Karvan" ticarət mərkəzində baş vermiş dəhşətli yanğının bir müddət sonra yenidən təkrarlanmasını yada salmış, orda yanğının ikinci dəfə baş verməsinin əsas səbəbi kimi ilk yanğından sonra müvafiq profilaktik tədbirlər görülməməsindən və hələ bugünədək də yanğınsöndürən maşınların ticarət mərkəzinə daxil olmasına  maneçilik törədən tikililərin oradan götürülməməsindən, bəzi binalarda yanğın pilləkənlərinin sakinlər tərəfindən qanunsuz olaraq sökülüb-çıxarılmasından, bunun isə Regional Mərkəz əməkdaşlarının diqqətindən kənarda qalmasından, yay mövsümündə çimərlik zonalarında xilasedicilərin daha sayıq və çevik olmasının labüdlüyündən, onların xilasetmə vasitələrinin və qayıqlarınınyay mövsümünə tam hazır vəziyyətə gətirilməsinin vacibliyindən söhbət açmışlar.
Dialoq-diskussiya şəklində keçən görüşdə Regional Mərkəzin müxtəlif şöbə və bölmələrinin zabitləri təhlükəli halların operativ və tez bir zamanda aradan qaldırılması məqsədilə Fövqəladə Hallar Nazirliyinin xətti ilə görülmüş tədbirlər barədə mətbuat nümayəndələrini məlumatlandırmış, onların təkliflərini dinləmiş və çoxsaylı suallarına cavab vermişlər.
 
Rəhman ORXAN
Xeberle.com
 

 

 

 

 

 

 

 

 

 

 

Xəbərdən istifadə edərkən istinad etmək vacibdir.