Azərbaycan Respublikası Prezidenti yanında Qeyri-Hökümət Təşkilatlarına Dövlət Dəstəyi Şurasının maliyyə yardımı ilə "Qadın Təşəbbüsü və Sosial Problemlərin Həllinə Yardım” İB-nin icra etdiyi "Insan alverinin potensial qurbanlarının maarifləndirilməsi və onlara sosial xidmətlərin təşkili, insan alveri ilə mübarizə sahəsində çalışacaq mütəxəssislərin hazırlanması”layihəsi çərçivəsində "İnsan alveri qurbanlarına psixoloji dəstək, etik davranış” mövzusunda təlim keçirilib. Təlimdə psixoloqlar, QHT nümayəndələri iştirak ediblər.

Təlimi giriş sözü ilə təşkilatın rəhbəri Zenfira Mustafayeva açaraq ilk növbədə layihənin məqsəd və məramı haqqında məlumat verib. İnsan alveri qurbanlarına psixoloji konsultasiyaların düzgün təşkil olunması,onların psixoloji reabilitasiyasının çətinlikləri barəsində iştirakçılar bilgiləndirib.

Təlimdə ekspert qismində Azərbaycan Respublikasının Əmək və Əhalinin Sosial Müdafiə Nazirliyinin İnsan alverinə qarşı mübarizə Mərkəzinin rəhbəri Nəzakət Balabəyova çıxış edib. Ekspert iştirakçılara "İnsan alverinin qurbanları və potensial qurbanlar kimlər ola bilər?”, "Həssas qrup dedikdə kimlər nəzərdə tutulur?”, həmçinin insan alverinə qarşı mübarizə haqqında qanunvericilik toplusu barədə məlumat verib.

Ekspert insan alveri qurbanlarının sosial reablitasiyası və onların müdafiəsi, insan alveri qurbanlarının reinteqrasiyası haqqında iştirakçıları maarifləndirib.

N. Babayeva insan alveri qurbanı olmuş şəxslərin normal həyat tərzinə qaytarılmasında psixoloqların rolundan geniş danışıb, qurban olduqdan sonra baş verən psixoloji travma,davranış reaksiyalarından söhbət açıb.

O, insan alveri qurbanlarına qarşı düzgün etik davranış qaydaları, qurbanların reabilitasiyasında emosional-psixoloji təhlükəsizlik atmosferinin yaradılması barədə danışıb.

Təlim interaktiv formatda keçirilib, auditoriyanın qaldırdığı məsələlər müzakirə edilib, verilən suallar geniş cavablandırılıb.

Təlim zamanı mövzuya aid qısametrajlı filmlər nümayiş olunub və bu filmlər ətrafında müzakirələr aparılıb.

Hər bir iştirakçı təlim materialları və mövzuya aid təşkilatın broşur və bukletləri ilə təmin edilib.

Təlimin sonunda təlimin qiymətləndirilməsi ilə əlaqədar sorğular keçirilmişdir.Təlim iştirakçılarının əksəriyyəti təlimin mövzusunun aktual olduğunu və gələcəkdə yenidən bu cür təlimlərdə iştirak etmək istədiklərini qeyd etmişlər.