Ailə məxsus olduğumuz ən ümdə dəyərlərdən biridir. Hər bir fərdin şəxsiyyət kimi formalaşması üçün ailə mühüm rol oynayan amillərdəndir. Əbəs yerə deməyiblər ki, bu dünyada ən dəyərli sərvət ailədir. Hansı ki, insan fərqində olmasa belə o, puldan və gücdən, qüvvətdən daha önəmlidir. Təəssüflər olsun ki, bu gün ailə insanlar üçün bir növ "oyuncağ”a çevrilib. 2017-cı ilin yanvar-iyun ayları ərzində qeydiyyat şöbələri tərəfindən 760 nikah və 355 boşanma halları qeydə alınmışdır. Dövlət Statistika Komitəsinin Sumqayıt şəhər şöbəsindən əldə etdiyimiz bu məlumat da ölkəmizdə ailə dəyərlərinin getdikcə sıradan çıxmasına əyani sübutdur. Xeberle.com olaraq son zamanlar boşanma hallarının çoxalmasının əsas səbəblərini araşdırmağa çalışdıq. "Qadın təşəbbüsü və sosial problemlərin həllinə yardım" İctimai Birliyinin sədri Zemfira Mustafayeva bununla bağlı fikirlərini Xeberle.com-a bildirib: "Gün ərzində bizə məişət məsələləri ilə bağlı 7-8 müraciət daxil olur, hansı ki, onlardan da 4-5-i sırf boşanma ilə əlaqədardır. Müasir dövrdə boşanmaların səbəbi həddindən artıq çoxdur. Ən böyük səbəb isə mənəvi dəyərlərin getdikcə yoxa çıxmasıdır. Mənəvi dəyərlər dedikdə dözümlülük, böyüyə hörmət, evdə lider kimi əri qəbul etmək və s. nəzərdə tuturam. Qayınanaların gəlinə qarşı ögey münasibəti, daha gözəl, rahat həyat axtarışı, serillarda və filmlərdə gördükləri ailələrə qibtə etmələri, sosial şəbəkələrdə yazışmalar, kənardan gələn cəzbedici, xoş sözlər və bu kimi digər səbəblər ailənin dağılmasına səbəb olan əsas amillərdəndir”. Klinik psixoloq Nuriyyə Quliyeva: "Daim ailə anlayışına və birliyinə cəmiyyətimizdə xüsusi önəm verilir, ailənin tamlığının qorunmasına diqqət yetirilir. Lakin təəssüf ki, son illər ölkəmizdə də boşanmaların sayı get-gedə artır. Boşanmanın səbəbləri arasında son dövrlərdə aktual olan sosial şəbəkələrdə cütlərin çox vaxt keçirməsi, ailə üzvlərinə qarşı laqeydlik, ailədəki rol və vəzifələrin icra edilməməsi, xəyanətlər sadalana bilər. Həmçinin ən ciddi səbəblərdən biri də iqtisadi problemlərin olmasıdır. Bu cür maddi problemlər ailədə söz-söhbətlərə və gərginliyə gətirib çıxarır. Bundan başqa münasibətlərə başqa şəxslərin müdaxilə etməsi də münaqişələri artırır. Bir məqama da diqqət çəkmək istəyirəm ki, əslində həmişə ailələrdə problem olub sadəcə öz ayağı üstündə dura bilən xanımlar az olduğuna görə həmişə güzəştə getmək məcburiyyətində qalıb. Dövrümüzdə əksər xanımlar təhsilli və iş sahibidirlər. Bu da onlarda özünəinam yaradır və ailədə sözlərini deyib, haqlarını tələb edə bilirlər. Boşanmaların qarşısını almaq üçün cütlər problemlərini özləri həll etməli, bir-birini dinləməyi və fikirlərinə hörmət etməyi bacarmalıdır. Problem üzərində müzakirə aparıb ortaq fikrə gəlməlidirlər”. Ümid edirik ki, gənclər ailə qurmazdan əvvəl bu yükün ağırlığını daşıya biləcəyini anlayaraq addım atacaq və nəticədə də boşanmaların sayı bu saya gəlib çıxmayacaq.