Xəbər verdiyimiz kimi,
iyulun 31-də Sumqayıtda 5 yaşlı Zeynəbi it dişləmişdi. İlkin müayinədən sonra o
evə göndərilmiş, lakin avqustun 17-də dünyasını dəyişmişdi. Bu hadisə Azərbaycanda
böyük əks-səda doğurdu.
Zeynəbin əmisi Rauf Mikayılov bildirir ki, sırf həkimlərin
məsuliyyətsizliyinə görə Zeynəb indi onların yanında yox, cənnətdədir. Hamı
deyir ki, 5 yaşlıq körpə it dişləməsinə görə ölüb. Onlar bilmirlər ki, onun
ölümü birbaşa həkimin məsuliyyətsizliyinə görə olub. Mahal həkim müayinəni
düzgün aparmayıb, yaranı düzgün təmizləməyib. İt Zeynəbin başından dişləmişdi,
onun saçı kəsilməli, düzgün qaydada ilk tibbi yardım göstərilməli idi. Həkimlər
xəstəliyin ciddiliyini nəzərə almadılar, adi it dişləməsi kimi qəbul edib,
yaranı ötəri təmizləməklə bant ilə yapışdırdılar. Bir şey ki yaranı təmizləməyə
pambıq tapmayıb, cuna ilə təmizləyiblər.
Rauf
Mikayılov söyləyir ki, uşağı Sumqayıtda saxlamaq da ən böyük səhvlərdən idi və
dərhal Bakıya göndərilməliydi. Əslində uşağı it dişləyən ilk gündən Qarayev
adına Uşaq Xəstəxanasına göndərməli idilər. Çünki sırf infeksion xəstəliklərə
Qara Qarayev adına Uşaq Xəstəxanası baxır. Ancaq onlar körpəmizi 4 gün
burada saxladılar. Zeynəbin 7 yaşlı
bacısı və 6 aylıq qardaşı var. Anası soruşub ki, əgər hər şey qaydasındadırsa,
biz evə gedək, onlar da deyiblər ki, 1 gün qalın, sabah sizi buraxacağıq.
Biz sıradan adamlarıq, tibb işçisi deyilik,
bilmirik bu xəstəliyin fəsadlarını
Quduzluq infeksiyası ilə
Sumqayıt şəhər 1 saylı Təcili Tibbi Yardım Xəstəxanasından "vəziyyəti qənaətbəxş”
diaqnozu ilə Zeynəb evə buraxıldıqdan sonra 1 nəfər belə zəng edib bizimlə
maraqlanmadı. Bizə xəstəlik barədə heç bir məlumat vermədilər, vəziyyəti
ağırlaşarsa, nə etməli olduğumuzu bizə başa salmadılar. Onlar balamızı evə
buraxmalı deyildilər, çünki quduzluq keçici xəstəlikdir, həm bizim ailəmiz
üçün, həm də Zeynəbimizin ətrafı üçün təhlükəli idi bu. Sonradan öyrəndim ki,
bu xəstəlik 1 ilə qədər öz fəsadlarını göstərə bilər.
Yara izləri sağalmışdı, ancaq xəstəlik daxildə öz
işini görürdü
Zeynəb yavaş-yavaş əvvəlki
vəziyyətinə qayıdırdı, həyətdəki uşaqlarla ünsiyyətdə olurdu. Hətta, avqustun
11-də bizim xeyir işimiz olanda, onu da toya aparmışdıq. Zeynəb toydakı bütün
uşaqlarla, qohum-əqrəba ilə ünsiyyətdə olmuşdu. Gülürdü, danışırdı, xoşbəxt
idi.
Həkim onu nəzarətdə
saxlamalı idi, həkimin vəzifəsi can qurtarmaqdır, can almaq yox. O, Zeynəbin həm
özünü, həm də ətrafını təhlükəyə atdı, 5 yaşlı canımızdan parçanı əlimizdən
aldı. Buna nə ad qoymaq olar axı?!
Sentyabrın 11-i 5 yaşı olacaqdı
Zeynəb atasına deyirdi
ki, ad günümdə mənə tort bişirtdirərsən. Səbirsizliklə ad gününü gözləyirdi. Nə
bilərdi axı, həkim məsuliyyətsizliyinə görə 5 yaşına çatmadan gözlərini ədəbi
yumacaq.
Mahal həkim körpəmizin
Əzraili oldu. Hal-hazırda müvafiq orqanlara göndərmək üçün şikayət ərizəsi
hazırlanır. O, elədiklərinə, qəssablığına görə mütləq cavab verəcək.
Onun gözlərinə qurban olum, o cür balanı öldürmək
olardı?!
Babası Əlövsət Mikayılov
deyir ki, Zeynəb ayın 13-ü axşam həmişəki kimi yatmağa gedib.
Səhər tezdən gördük ki,
balamız qızdırmadan yanır, daha sonra qaytarmağa başlamışdı. Birinci elə bildik
ki, istidəndir, gün vurub. Amma sən demə, xəstəlik baş qaldırıbmış. Bizim bilməməyimizin
səbəbi həkimin bizi məlumatlandırmaması idi.
Son günlərində daha çox əziyyət
çəkirdi, nəvəm. Gözümün önündən getmir onun baxışları, eləcə su istəyirdi.
Verirdik, içə bilmirdi, boğazı düyünlənmişdi. Pambığı suya batırıb ağzına çəkirdik,
saniyələr keçməmiş ağzından köpüklər gəlirdi. Suya həsrət öldü körpə balam.
Mahal həkim mənə dedi ki, sən bilirsən ki, kimlə
danışırsan?!
Əmisi Rauf Mikayılov
avqustun 14-nü belə xatırlayır:
Səhər mən, babası və
anası uşağı vaxt itirmədən travmatologiyaya apardıq. Mən gördüm ki, orada heç
bir həkim sinəsini qabağa vermək istəmir. Çünki onlar dərk edirdilər ki, körpədə
quduzluğa yoluxma var. Mən dilimlə dedim ki, siz bacarmırsınızsa, göndəriş
verin, aparım uşağı Bakıya. Güclə onlardan təyinatı aldım. Burdan Bakıya gedəndə,
onlar xəstəyə quduzluq diaqnozu qoymamışdılar. Bakıda Zeynəbə quduzluq diaqnozu
qoyuldu.
Uşağı Bakıdakı xəstəxanaya
qoyandan sonra, Sumqayıta gəldim. Dedilər ki, həkim məzuniyyətdədir. Dəqiq
bilmirəm elə idi, ya yox. Mən təkidlə həkimə zəng elədim, dedim ki, gəl 5 yaşlı
körpənin 6 aylıq qardaşına, 7 yaşlı bacısına, ünsiyyətdə olan körpələrə, ailəsinə
zamin dur ki, quduzluq heç kəsə keçməyib. Mənə qayıdıb dedi ki, sən bilirsən
heç mən kiməm?!
2 yaşlı Zəhramızı öldürən erməni ilə, səhiyyədəki
qatilin fərqi nədir?
Deyirlər ki, həkimə şiddətli
töhmət verilib. Töhmət alıb orada qalacaqsa, yenə məsuliyyətsizliyinə görə körpələrin
canına qıyacaqsa, onun orada nə işi var axı?!
Siz mənə deyin, 2 yaşlı Zəhramızı
öldürən erməni ilə, səhiyyədəki Zeynəbin qatilinin fərqi nədir?!
Ümid edirik ki, 5 yaşlı
Zeynəbimizin ölüm səbəbi tam araşdırıldıqdan sonra günahı olan insanların
hamısı cəzasını çəkəcək və daha körpə balalarımız it dişləməsi səbəbi ilə, ölməyəcək.
Onların körpə bədənləri torpağın altında qalmayacaq, gülüş səsləri daima eşidiləcək.
Hicranə İsmayılova
Foto: Kamran Bayramov
Xeberle.com
Xəbərdən istifadə edərkən istinad etmək vacibdir.
