Zaman-zaman  məlum olmayan mənbədən "Whatsapp” istifadəçilərinə kütləvi surətdə mesajlar göndərilir. Mətn və ya səs formasında olan bu cür mesajlar istifadəçilər arasında sürətlə yayılmaqla bərabər, eyni zamanda panikaya səbəb olur.
"Whatsapp” istifadəçiləri dünən də eyni vəziyyətlə qarşılaşıb.  Xəbərdarlıqda Ayın Yerə həddindən artıq yaxınlaşdığı üçün Yer planetində güclü kosmik fırtına, şüalanmanın olacağı qeyd edilib.
 Maraqlıdır, bu cür mesajların qarşısını necə almaq olar?  Mesajların cəmiyyət üçün fəsadları ola bilərmi?
 
Mesajların yayılmasında müxtəlif məqsədlər güdülə bilər
Azərbaycan İnternet Forumunun prezidenti Osman Gündüz açıqlamasında bildirib ki, qeyd edilən mesaj mənasız və spam xarakterlidir:
 
"Bu mesajın söykənəcəyi, əsaslandırılmış mənbəyi yoxdur. Bu cür mesajlar hansı oturuşmuş quruma istinadən yayılıb, məlum deyil. Digər tərəfdən mesajın informasiya mənbəyi nədir və ya kim tərəfindən yayılıb? Bu iki fakta əsasən düşünürəm ki, ciddiyə alınası mesajlar deyil. Hazırda sosial şəbəkələr, sosial medialar açıq formada fəaliyyət göstərir. Bu mesajların da hansısa qruplar tərəfindən yayılmasında müxtəlif məqsədlər güdülə bilər. Bu tip mesajlar yayılanda nə baş verə bilər? Bununla bağlı ümumi vəziyyəti öyrənmək lazımdır. Kimlərsə sabah üçün əhaliyə, geniş kütləyə mesajların çatdırılması mexanizmini, bunun reaksiyasını öyrənə bilər. İstənilən halda bu, cəmiyyət üçün zərərli bir şeydir”.
 
İstifadəçilərə baş verənlərlə bağlı qabaqcadan xəbərdarlıq edilməlidir
 
O.Gündüz belə proseslərin qarşısını almaq üçün görülməli tədbirlərdən də söz açıb:
"İlk növbədə istifadəçilər bunun qarşısını almalı və mesajların çoxaldılması prosesində iştirak etməməlidirlər. Eyni zamanda Azərbaycanda Nəqliyyat, Rabitə və Yüksək Texnologiyalar Nazirliyi yanında Elektron Təhlükəsizlik Mərkəzi var. Qeyri-dövlət sektorunun informasiya  təhlükəsizliyinə də bu qurum cavabdehdir. Bu baxımdan qurumun əsasnaməsinə görə profilaktik addımları atılmalıdır. Yəni internetdə, sosial mediada  baş verənlərlə bağlı istifadəçilər qabaqcadan xəbərdar edilməlidir.  Daha sonra bunun aradan qaldırılması ilə bağlı  metodiki informasiya dəstəyi olmalıdır.  Təəssüf ki, bu qurumun elə tədbirinə rast gəlməmişəm. Onun saytında bunlarla bağlı informasiyalar yerləşdirilməlidir. Media qurumlarına məlumatlar, press relizlər təqdim edilməlidir: nə baş verib, mahiyyəti nədir və hansı addımlar atılmalıdır?.
Bu tip mesajların yayılmasında maraqlı olan qurumlar ola bilər. Aidiyyatı qurumlar və təhlükəsizliklə məşğul olan təşkilatlar  belə şeylərin monitorinqini aparmalı və məqsədin nədən ibarət olduğunu araşdırmalıdırlar. Çünki sabah daha fərqli məqsədlər üçün bu cür mesajlardan istifadə oluna bilər”.( Modern.az)

Xəbərdən istifadə edərkən istinad etmək vacibdir.