Məlumdur ki, son zamanlar Sumqayıt şəhərinə yeni, böyük ölçülü, rahat və kameralarla təchiz olunmuş marşrut avtobusları gətirilir.
Bunlara 2, 5, 7 və s. kimi avtobusları misal göstərmək olar.
Bəs görəsən, avtobuslardakı müşahidə kameralarına aidiyyəti orqanlar tərəfindən mütəmadi şəkildə nəzarət olunurmu?
Sualımıza cavab tapmaq üçün Xeberle.com olaraq Sumqayıt şəhər Nəqliyyat Departamentinin rəisi Seyfulla Əsədullayev ilə əlaqə saxladıq. Onun sözlərinə görə, kameralar daim işləyir, lakin onlar yalnız departamentə şikayət daxil olduğu zaman qurum tərəfindən izlənilir: "Əgər oğurluq, mübahisə və s. kimi hallarla bağlı bizə şikayət olunursa, həmin gün biz müşahidə kameralarını izləyir və məsələnin həllini tapmağa çalışırıq.Oğurluqla bağlı müraciət olunduğu zaman avtobusun nömrəsi sərnişinin yadında qalıbsa, oğurluq edən şəxsi tapmaq bizim üçün daha asan olur. Belə olduqda məsələni dərhal həll edir və oğurlanmış əşyanı sahibinə çatdırırıq.
Məsələn, bu yaxınlarda bir xanımın çantasını oğurlamışdılar. Kameralar vasitəsilə oğrunu tapdıq və çantanı sahibinə qaytardıq. Bu gün isə 3 nömrəli marşrut avtobusunun sərnişini sürücü ilə bağlı bizə şikayət edib. Hər ikisini yanıma çağırdım, məsələni aydınlaşdırdım, sürücüyə 3 gün vaxt verdim ki, işinin icrasını qaydasına qoysun və avtobusun idarəsinin əlindən alınacağı barədə xəbərdarlıq etdim”.
Qeyd edək ki, son zamanlar sərnişin-sürücü mübahisələri ilə bağlı videogörüntülər sosial şəbəkələrdə də yayımlanaraq günümüzün ən aktual məsələlərindən birinə çevrilib.
Elnarə Salamova
Xeberle.com
Xəbərdən istifadə edərkən istinad etmək vacibdir.
