Cari dərs ilinin başlanması ilə əlaqədar sabahdan tələbələrin Bakıya axını çoxalacaq. Bəs görəsən, bununla bağlı Sumqayıt şəhər avtovağzalı xüsusi gücləndirilmiş iş rejiminə keçəcəkmi?

Xeberle.com olaraq sualımızın cavablandırılması üçün "Sumqayıt Avtovağzalı”nın müdiri Şamil Abbasovla əlaqə saxladıq. Onun sözlərinə görə, avtovağzalın içərisindən işləyən və onun balansında olan cəmi 30 marşrut avtobusu var: "Digərləri bizim balansımıza daxil deyil və avtovağzaldan kənarda fəaliyyət göstərirlər. Ayın 15-i üçün İcra Hakimiyyətindən 10 ədəd böyük, 36 yeri olan yeni marşrut avtobusları gətirilib. Çox güman ki, bu gün və ya sabahdan fəaliyyət göstərəcəklər. Bakı-Sumqayıt avtobuslarında interval məsələsinə gəldikdə isə, avtobusların sayı az olduğu üçün interval müəyyən etmək də mümkün deyil. Avtobus dolduqdan dərhal sonra hərəkət edir. İntervalın müəyyən olunması üçün avtobusların sayının çox olması lazımdır”.

Qeyd edək ki, dərs ili başladıqdan sonra minlərlə tələbə hər gün Sumqayıtdan Bakıya üz tutacaq və bu da, avtobus sayının artırılmasına böyük ehtiyac yaradacaq.