Xocahəsən istiqamətindən Avtovağzala doğru gələn yol genişləndirilir və Bakıdan şimal bölgəsinə hərəkət edən qatarın keçdiyi relslərin üzərində körpü salınıb. Körpünün uzunluğu 100 metr, eni isə 15 metrdi. 

İş icraçısı Sahib Əliyev bildirib ki, körpünün tikintisinə 7 aya yaxındır başlanıb. Onun sözlərinə görə, tikinti işlərini Nəqliyyat Nazirliyinin sifarişi ilə “Körpü-Bina-Tikinti” MMC həyata keçirir. 

S.Əliyev tikintinin nə zaman başa çatacağını bilmədiyini deyib: “İşin 70%-i görülüb. Amma qış olduğu üçün havaya görə mütəmadi işləmək olmur. Buna görə də nə vaxt istifadə veriləcəyi dəqiq deyil”.

Bakı-Sumqayıt yolunun sol kənarında çoxlu yaşayış evi olduğundan, bu tikintinin onlara necə təsir edəcəyi ilə maraqlandıq. Sahib Əliyev bildirdi ki, hazırki tikinti işləri vətəndaşların evlərinə heç bir təsir etməyib: “İndi tikilən körpü hazırda istifadə olunan Bakı-Sumqayıt şosesinə birləşdiriləcək. Bu, yollarda yaranan tıxacı azaltmaq üçündür. Yolun körpü hissəsi ümumiyyətlə evlərə təsir etmir. Yalnız asfalt hissə bir neçə evin qarşısından keçir. Onlar üçün də yer ayrılıb, oradan giriş-çıxış üçün istifadə edərlər”.

Həmin vaxt yolun kənarında dayanıb tikinti işini seyr edən 11 nömrəli evin sahibi ilə söhbətləşdik. Ev sahibi dedi ki, yeni salınan asfalt yol onun darvazasından 3-4 metr məsafədədi: “Yol kənarında yaşayanların bir çoxu qaçqın ailələri idi. Onlara hardasa ev verdilər, çıxıb getdilər. İndi həmin evlər boşdu. Bizə də 1 il əvvəl icra hakimiyyətindən gəlib dedilər ki, evləriniz söküləcək. Əvəzində ya ev veriləcək, ya da hər kvadmetr üçün 600 manat ödəyəcəklər. Amma demək olar ki, iş qurtarıb, hələ də gəlib bir söz demirlər”. 

Hazırda həmin evlərdə yaşan sakinlərin həyatı ciddi təhlükədədir. Onlar və övladları qapını aşan kimi birbaşa şoseyə çıxmalı olurlar. Bəlkə də elə bu səbəbdəndir ki, Bakı-Sumqayıt yolunda avtomobil qəzalarının sayı xeyli artıb. 

/hafta.az/