Bu gün insan alveri dünyanın bir nömrəli problemlərindəndir. Respublikamız da  qloballaşan dünyanın ayrılmaz hissəsi olduğundan bu böyük bəladan kənarda qalmayıb. Ekspertlər deyirlər ki, Azərbaycanda insan alverinin daha çox iki forması yayılıb.  Əvvəllər bir sıra qanunsuz işədüzəltmə şirkətləri var idi ki, onlar insanları aldadaraq istismar edə bilirdilər. Ekspertlərin fikrincə, insan alverinin qarşısının alınması və bu kimi halların azaldılması məqsədilə keçirilən bir sıra layihələr artıq öz bəhrəsini verib. Heç kim bu bəladan sığortalanmayıb və potensial qurbanlar insan alverçilərinin əsas hədəfləridir. Maraqlı sual ortaya çıxır: Bəs bu qurbanlar kimlər ola bilər? Ekspertlərin fikrincə, insanları bu yola sürükləyənlər əsasən qohum və tanışlar olur.  Onlar  şirnikləşdirmə,  gözəl bir həyat  və iş müqabilində adamları aladadaraq yoldan çıxarırlar. Rəsmi statistikaya görə, ötən il 147 insan alveri və məcburi əmək cinayəti faktı aşkarlanıb. Bu və digər əməllərə görə 31-i qadın, 7-si kişi olmaqla 38 şəxs cinayət məsuliyyətinə cəlb edilib, 15 cinayətkar qrup zərərsizləşdirilib. İnsan alverinin qurbanı olan, cinsi istismara, zorakılığa məruz qalan şəxs özünü alçalmış, təhqir olunmuş hiss edir.  Psixoloqların sözlərinə görə, onların cəmiyyətə yenidən adaptasiyası çətin və uzun bir prosesdir. Azərbaycanda insan alveri cinayətlərinin qarşısının alınması və onunla mübarizə məqsədilə 152 saylı "qaynar xətt” xidməti fəaliyyət göstərir. Özünüzü və yaxınlarınızı bu bəladan qorumaq üçün diqqətli olun! Diqqətli olun ki, sonradan peşmançılıq çəkməyəsiniz!

Xəbərdən istifadə edərkən istinad etmək vacibdir.