Sumqayıt Şəhər İcra Hakimiyyətinin başçısı yanında Sumqayıt Avtomobil Nəqliyyatı ilə Sərnişindaşıma İdarəsinin rəisi Seyfulla Əsədullayev Xeberle.com-a açıqlamasında bu məsələlərə aydınlıq gətirib. İdarə rəisi bildirib ki, yaxın vaxtlarda şəhərdə müəyyən olunmuş yerdlərdə taksi dayanacaqlarının yaradılması planlaşdırılıb. S.Əsədullayev taksi fəaliyyəti göstərmək üçün şərtləri də açıqlayıb: "Ümumiyyətlə, şəhərdə taksi fəaliyyəti göstərmək üçün sürücülər ilk olaraq VÖEN almalı, növbəyə durmalıdır. Sonra onlar "Sumqayıt Nəqliyyat" MMC-yə müraciət edib, sənədləri təqdim etdikləri zaman fərqlənmə nişanı alırlar ki, taksi fəaliyyəti göstərə bilsinlər.

Aylıq taksi rüsumu nə qədərdir?

Qurum rəhbərinin sözlərinə görə, aylıq rüsum qanunla 35 AZN təşkil edir: "İndi isə hamı deyir ki, mən 20 AZN verirəm, yoxumdur. Elə deyil axı, dövlətimizin büdcəsi nə ilə formalaşmalıdır? Heç kim ödənişi edib, qəbzi alıb işini görmək istəmir. Deyirlər, mən qaçqınam, mənim 10-15 manatım var. Elə bil ki, bazardır. Bu günə qədər bu problemi həll edə bilməmişik."

Bəs Sumqayıtda taksi dayanacaqları varmı?

S.Əsədullayev deyir ki, Sumqayıtda taksi dayanacaqları var: "Hətta biz Memarlıq və Şəhərsalma İdarəsinin nümayənədələri ilə şəhərdə monitorinq aparmışıq. Taksi dayanacaqlarının yaradılması üçün ərazilərin siyahısı hazırlanıb və təsdiq olunmasını gözləyirik. Ondan sonra isə taksi nişanları şəhərimizə qoyulacaq ki, bundan sonra taksilər orada saxlayacaqlar. Zənnimcə, bu avtobuslarla taksilərin arasında olan dayanacaq problemini də həll edəcək."

Hicranə İsmayılova

Xeberle.com