Millət vəkili Aydın Mirzəzadə bu gün tanınmış bəstəkar, əməkdar incəsənət xadimi Tahir Əkbərin vəziyyəti ilə maraqlanmaq üçün Respublika Müalicəvi Diaqnostika Mərkəzində olub.
Xeberle.com Kult.az-a istinadən xəbər verir ki, bu barədə millət vəkilinin özü qeyd edib. O bildirib ki, xəstəxananın baş həkimi Könül xanım Xəlilova ilə görüşərək, Tahir müəllimin vəziyyəti barədə danışıb:
"Baş həkimlə birlikdə reanimasiya şöbəsində xəstənin yanında olduq. Tahir Əkbəri müalicə edən Rövşən həkim müalicə prosesi barədə müfəssəl məlumat verdi. Onun vəziyyəti stabil ağırdır. İntensiv müalicə gedir. Vəziyyəti daim diqqətdə saxlanılır.
Müalicənin xərclərini öz üzərinə götürmüş Heydər Əliyev Fondundan bəstəkarın vəziyyəti ilə mütəmadi maraqlanırlar”.
Qeyd edək ki, əməkdar incəsənət xadimi, bəstəkar Tahir Əkbər insult keçirərək 1 saylı Klinik Tibbi Mərkəzə yerləşdirilib. Onun bütün müalicə xərclərini Birinci vitse-prezident, Heydər Əliyev Fondunun rəhbəri Mehriban xanım Əliyevanın tapşırığı ilə Heydər Əliyev Fondu öz üzərinə götürüb.

Xəbərdən istifadə edərkən istinad etmək vacibdir.