Ey mavi göylərin bəyaz ve qızıl süsü,

Bacımın gəlinliyi , şəhidimin son örtüsü,

İşıq- işıq, dalğa dalğa bayrağım!

Sənin dastanını oxudum, sənin dastanını yazacam.

Sənə mənim gözümlə baxmayanın

Məzarını qazacam.

Arif Nihat Asya

9 noyabr türk dünyasının özəlliklə də Azərbaycanın tarixinə qızıl hərflərlə yazılan bir gündür. 1918-ci il noyabrın 9-da Bakıda Azərbaycan Xalq Cumhuriyyəti Nazirlər Şurasının yerləşdiyi binada üçrəngli müqəddəs bayrağımın qəbul olunduğu və ilk dəfə dalğalandığı gündür. Cəmi 1 il 11 ay ömrü olan dövlətimin bu müqəddəs bayrağı 1 il 4 ay şərqin ilk demokratik cumhuriyyəti olan Azərbaycanın səmalarında dalğalana bilmişdi.

Müstəqil Azərbaycanın dövlət bayrağındaki 3 rəngin ifadə etdiyi və 20-ci əsrin əvvəllərindəki milli istiqlal ideolagiyamızın 3 təməl prinsipini təşkil edən "türkçülük islamçılıq və müasirlik" düsturunun müəllifi görkəmli Azərbaycan mütəfəkkiri Əli bəy Hüseynzadədir. Başda Əli bəy Hüseynzadə olmaqla bu bayrağın qaldırılmasında rolu olanlar nə yazıq ki üçrəngli bayrağımızın dalğalanmasını çox görə bilməmişdirlər. 70 il bizə "Qızıl Ordu" deyə sırımaq istədikləri qanlı rus ordusunun əli ilə üçrəngli o müqəddəs hilalım 28 aprel 1920-ci ildə Azərbaycan səmalarından endirilmişdir.

Amma bu bayrağı Azərbaycan göylərinə çəkən mütəfəkkir və aydınlarımız ölüm yatağında belə üçrəngli hilalımızın bir daha dalğalanacağına əmin idilər. Böyük Məhəmməd Əmin Rəsulzadənin "Bir kərə yüksələn bayraq bir daha enməz" fikirləri də yuxarıda dediklərimi bir daha sübut edir.

Bu gün Azərbaycanda müqəddəs bir gündür. Nazlı hilalımın dalğalandığı gündür. O bayraq dünyanın ən gözəl sözlərinə layiqdir. Çünkü o birdən-birə vətən göylərinə çəkilməyib. Bu hilal uğrunda onminlərlə şəhid qanı tökülüb. Şair necə demişdi:

Üçrəngli bayrağı öz qanlarıyla,

Vətən göylərinə çəkdi şəhidlər.

Torpağın bağrına cəsədləriylə,

Azadlıq tumunu əkdi şəhidlər.

Odur ki Vətən torpağını bayraqsız bayrağı torpaqsız düşünmək olmaz. Torpaq da bayraq da bir millətin namusudur. Namusu qorumaq bir ulusun borcudur. Xoşbəxt o kəsdir ki torpaq və Vətən üçün ölməsini də öldürməsini də bilir. Nə qədər çətin olsa da etiraf edəcəm ki çox insan bu bayrağın nə qədər dəyərli olduğunu anlamır. Halbuki türk üçün hər şeyin üstündədir o bayraq. İlk dəfə "Nərimanov" klubunun qarşısındaki mitinqdə görmüşdüm üçrəngli ay ulduzlu hilalımı. Yanımda bir neçə nəfərə o nə bayraqdır deyə sorduğumu bilirəm Onda orta məktəbdə oxuyurdum.Hərkəs mənim kimi təəccüblə o gözəl bayrağa baxırdı. O arada bir nəfər mənə gülümsəyərək bu bayrağın Azərbaycanın milli bayrağı olduğunu ilk dəfə 1918-ci ildə qəbul olunduğunu dedi. sonradan öyrəndim ki bu şəxs Sumqayıtdaki 23 nömrəli məktəbdə müəllim işləyən Aydın Əliyev imiş. Mitinq boyunca gözümü bayraqdan çəkə bilmədim. Nədənsə bu yazını yazanda bir anlıq o illərə getdim o hissləri yaşadım. Hazırda Vətəndən nə qədər uzaqda yaşasam da evimin ən gözəl guşəsində duran üçrəngli bayrağımla dərdlərimi bölüşürmüş kimi bir hiss yaşayıram.

Əlimi uzadıb göz yaşımı sildim. Üçrəngli ay ulduzlu nazlı hilalım mənə "Ağlama, bir kərə yüksələn bayraq bir daha enməz. Söz verirəm. Azərbaycanın qəhrəman övladları sayəsində mən İrəvanda, Dərbənddə, Borçalıda, Qarabağda və Təbrizdə dalğalanacam" dedi. Mən də bayrağıma "cismim bunu görməsə də bir gün ruhumun bunu görəcəyinə əminəm" sözləri ilə pıçıldadım.

Nazlı hilalımla bağlı çox şey yazmaq olar. Nə dastanlar nə əsərlər. Amma heç biri onu vəsf etməyə yetməz. Odur ki Tanrımdan tək diləyim bizlərə və gələn nəsillərimizə bir daha o bayraqdan ayrı düşməyi nəsib etməsin.

Canım Azərbaycanım. Müqəddəs Bayraq bayramınız mübarək olsun! Unutmayın bayraqları bayraq edən üstündəki qandır. Torpaq uğrunda ölən varsa Vətəndir. Xoşbəxtdik ki, torpağımız uğrunda ölən şəhidimizin qanı var bayrağımızın üstündə. Hər gördüyünüz yerdə ayaq saxlayıb hörmət ilə baxmağı unutmayın.

P.S.9 Noyabr 2010-cu ildən etibarən Azərbaycan Respublikası prezidenti İlham Əliyevin sərəncamı ilə dövlət bayrağı günü kimi qeyd olunur.Hətta Azərbaycanın paytaxtı Bakıda böyük bir Bayraq meydanı var ki Ginnesin Rekordlar Kitabına düşən ən böyük (162 m yüksəkliyində) Azərbaycanın üçrəngli bayrağı dalğalanır.Bayrağın eni 35 m uzunluğu 70 m-dir.Bayrağın üzərində durduğu qurğunun kütləsi 220 tondur.