Son illər Sumqayıtda görülən abadlıq işləri nəticəsində şəhərimiz daha da gözəlləşib. Sumqayıtda baş verən bu dəyişikliyi görülən abadlıq və quruculuq işləri ilə yanaşı, daim təmizlik işlərinin qeydinə qalan dalandarlara da borcluyuq. Hansı ki, hər birimiz onları yol kənarındakı daşların üzərində oturarkən və ya ətrafda zibil qutuları olmasına baxmayaraq, kiminsə yerə atdığı tullantıları təmizləyərkən görürük.
Bəs görəsən, Sumqayıt şəhərində küçələri və binadaxili əraziləri təmizləyən nə qədər dalandar var? Onların geyimlərini dəyişmələri və iş alətlərini qoymaları üçün xüsusi yerlər varmı?
Xeberle.com olaraq bu dəfə Sumqayıt Mənzil Kommunal Təsərrüfatı İstehsalat Birliyinin baş mühəndisi Atəş Məmmədov ilə əlaqə saxlayaraq dalandarların iş şəraiti, sayı ilə tanış olmağa çalışdıq. A.Məmmədov bildirdi ki, onlar geyimlərini dəyişmələri üçün xüsusi yerlərlə təmin olunurlar: "Dalandarlar üçün mənzil istismar sahələrində, zirzəmilərdə, köhnə zibilxanaların ətafındakı tikinti obyektlərində xüsusi yerlər təşkil olunub və onlar həmin yerlərdə geyimlərini dəyişir, iş alətlərini o yerlərə qoyurlar. Sumqayıt şəhərində fəaliyyət göstərən dalandarların sayı məsələsinə gəldikdə isə, məhəllədaxili ərazilərdə, mənzil kommunal sahələrində 528 və bir o qədər də küçələri təmizləyən dalandar var. Onların demək olar ki, 99 faizini qadınlar təşkil edir. Kişilər isə qadınlar üçün ağır iş olduğundan, ən çox zibil qutularının ətrafına atılan tullantıları kürəklə təmizləmək üçün təyin olunurlar”.
Qeyd edək ki, ətraf mühitin qeydinə qalmaq və küçələrimizi təmizləyən dalandarların işini çətinləşdirməmək üçün biz də var gücümüzlə çalışmalıyıq. Unutmayaq ki, həmin insanlar da kiminsə anası, bacısı, atası və ya qardaşıdırlar.
Elnarə Salamova
Xeberle.com
Xəbərdən istifadə edərkən istinad etmək vacibdir.
