SOCAR-ın "Azərikimya” İstehsalat Birliyi "Qızıl Aypara” Cəmiyyətinin Sumqayıt şəhər təşkilatı ilə birgə "Mərhəmətli olmağa tələsin!” devizi altında növbəti xeyriyyə aksiyasına start verib.
Tədbirdə çıxış edənlər 7 ildən bəri davam edən və artıq ənənə halını almış aksiyanın əsas qayəsinin ehtiyacı olan uşaqların isti qış geyimləri ilə təmin olunmasında yardımçı olmaq, onların uşaq dünyasına yeni rəng qatmaq olduğunu iştirakçıların diqqətinə çatdırıblar. Vurğulanıb ki, 15 gün davam edəcək aksiyada əldə olunan vəsaitlər "Qızıl Aypara” Cəmiyyətinin Sumqayıt şəhər təşkilatında toplanacaq, məqsədyönlü şəkildə və aksiyada iştirak edənlərin bilavasitə iştirakı ilə aztəminatlı ailələrin uşaqlarına paylanacaq.
"Azərikimya” İstehsalat Birliyinin Müşahidə Şurasının sədri, Milli Məclisin deputatı Muxtar Babayev və Respublika "Qızıl Aypara” Cəmiyyətinin Sumqayıt şəhər təşkilatının sədri Mətanət Məhərrəmova bu günə qədər bu xeyirxah təşəbbüsə qoşulan və bu gün də bu missiyanı ürəklə davam etdirən idarə, müəssisə və təşkilat rəhbərlərinə, həmçinin fərdi sahibkarlara minnətdarlığını ifadə ediblər.
Xəbərdən istifadə edərkən istinad etmək vacibdir.
