Maraqlıdır şəhərdə baş verən hadisəni dəqiqləşdirmək və ya əlavə məlumat almaq jurnalistlər üçün Sumqayıtda fəaliyyət göstərən qurumlar əlçatandırmı? Hansı qurumlar münasibət bildirməkdən çəkinir və ya həmişə cavab verirlər?

Xeberle.com olaraq bu suallara cavab tapmaq üçün müxtəlif saytlarda işləyən jurnalistlərə aşağıdakı sualı ünvanladıq:

"Sumqayıtda hər hansı məsələylə bağlı münasibət öyrənmək və ya məlumat əldə etmək əlçatandırmı?"

Mirmahmud Kazımoğlu(Modern.az):

"Jurnalistlərlə aralarında məsafə saxlayan mətbuat katiblərinin hər dəfə yarıtmaz işini görəndə onlara verilən maaşa heyfim gəlir. Bir məqamı xüsusi qeyd edim ki, mediada işləyib daha sonra mətbuat katibi vəzifəsində çalışanlar KİV-ə daha yaxındırlar. Ümumilikdə isə narazı olmadığımız mətbuat xidmətlərinin adlarını çəkmək daha rahatdır. Çünki sayları barmaqla sayılacaq qədərdir. Hazırda mətbuat xidmətləri yeni qayda ilə fəaliyyət göstərirlər. Onlar müxtəlif bəhanələrlə fərdi qaydada jurnalistlərin suallarını cavablandırmaqdan yayınırlar. Ən yaxşı halda, jurnalistə yazılı qaydada müraciət etməyi tövsiyə edirlər. Sumqayıtda da bu tendensiya mövcuddur. Belə ki, İcra Hakimiyyətinin mətbuat xidmətindən başqa, digər yerli orqanların ictimaiyyətlə əlaqələr şöbələri jurnalistin onlara ünvanladığı sualları cavablandırmaqdan yayınırlar. Amma mən nə zaman İcra Hakimiyyətinin mətbuat xidmətinə sual ünvanlamışamsa, cavab almışam".

Səlcuq Elçin (Lent.az):

"Sumqayıtla bağlı xəbər yazmaq istədikdə mənbələr varsa informasiyanı rahatlıqla alıram, mənbəsi olmayan şəxslər olduqda isə çətinlik çəkirəm. Misal üçün, Sumqayıt məhkəməsindən, prokurorluqdan, polisdən, Təcili Tibbi Yardımdan məlumat almışam. İnformasiya aldıqda çətinlik çəkdiyim zaman isə digər yollarla münasibət almağa çalışıram. Ümumilikdə, Sumqayıtla bağlı məlumat almağa çətin deməsəm belə rahat da deməzdim. Bu hal isə tək Sumqayıt üçün yox digər yerlər üçün də keçərlidir".

Anar Kəlbiyev (Azvision.az):

"Sumqayıtda hansısa məsələ ilə bağlı xəbər yazmalı olduğumda yerli orqanlardan münasibət öyrənməkdə çətinlik çəkməmişəm. Amma sözsüz ki, müəyyən çətinliklər olan məqamlar da var".

Firuzə Vahid (Axar.az):

"Sumqayıtda olan problemlə bağlı İcra Hakimiyyətində olan bütün şəxslərlə danışmışdım demək olar ki. Ancaq onlar məsələyə aydınlıq gətirmək əvəzinə daha çox bir-birinin üstünə atmağa çalışırdılar. Və sonda da mən açıqlama aldığım şəxsin nömrəsini Ekologiya Nazirliyindən əldə etmişdim. Bundan başqa digər yazımda isə Sumqayıt şəhər İcra Hakimiyyətinin mətbuat katibi İcra Hakimiyyətindən verilən açıqlamadan xəbərsiz olduğunu mənə bildirmişdi. Bu səbəblərdən də Sumqayıtdakı qurumların əlçatan olduğunu deməzdim".

Zaur Əhməd (Mia.az):

"Ümumiyyətlə, son illər dövlət qurumlarından məlumat almaq çətinləşib. İcra orqanlarının vəzifəli şəxsləri ilə yanaşı, mətbuat xidmətlərindən də nəsə öyrənmək müşkül məsələ olub. Sumqayıt Şəhər İcra Hakimiyyəti ilə əlaqələrim sıx olmasa da, hər hansı bir məlumat almaqda çətinlik çəkməmişəm. Amma ayrı-ayrı məmurlarla bağlı bu fikri söyləmək olmaz. Adətən İcra Hakimiyyətinin saytında qeyd olunan telefon nömrələrinə zəng edəndə katibə, yaxud daha aşağı vəzifəli şəxs danışır. Ümumilikdə götürəndə isə İcra Hakimiyyəti ilə bağlı hər hansı məlumat almaq vəziyyətini kafi qiymətləndirə bilərik".

Könül Cəfərli (Publika.az ):

"Əslində bu sahədə elə də ciddi problem yoxdur. Sadəcə, Sumqayıtda ən ciddi problemlərdən biri Bakı-Sumqayıt yolunda baş verən nəqliyyat hadisələri ilə bağlıdır. Başqa belə bir problem olmur. Xəstəxanalar olsun, məktəblər olsun və ya Təhsil, Səhiyyə şöbəsi olsun məlumatı rahatlıqla ala bilirik".

Hicranə İsmayılova

Xeberle.com