Azərbaycan Respublikasının Prezidenti yanında Gənclər Fondunun (AZGF) maliyyə dəstəyi ilə reallaşdırılan "Vətənpərvərliyin inkişafında oxu mədəniyyətinin rolu” layihəsi çərçivəsində sonuncu tədbir Sumqayıt Gənclər Evində keçirilib.
Xeberle.com xəbər verir ki, Sumqayıt Şəhər İcra Hakimiyyətinin dəstəyi ilə reallaşdırılan tədbirdə çıxış edən layihə rəhbəri Samir Pənəliyev daim yüksək intellekti ilə seçilən Azərbaycan gənclərinin ölkəmizin ictimai-siyasi həyatında fəal rol oynadıqlarını diqqətə çatdırıb. Qeyd edib ki, dövlət tərəfindən hərtərəfli qayğı ilə əhatə olunan gənclərimiz cəmiyyətin avanqardına çevriliblər. Bu gün Azərbaycanda gənclərin potensialının üzə çıxarılması, onların fəaliyyəti üçün hər cür şərait yaradılıb.
S.Pənəliyev bildirib ki, layihə çərçivəsində Bakı, Sumqayıt, Gəncə şəhərlərində, eləcə də İsmayıllı rayonunda yaşayan yeniyetmə və gənclər üçün təlimlər təşkil olunub. Təlimlərin məqsədi Azərbaycan elmi və bədii ədəbiyyatı nümunələri əsasında oxu mədəniyyətini və vətənpərvərliyi təbliğ etmək, yeniyetmə və gənclərə dövlətin və millətin mənafeyini hər şeydən üstün tutmağı aşılamaqdır.
Layihənin eksperti, Jurnalist Araşdırmaları Mərkəzinin sədri Seymur Verdizadə, Sumqayıt Şəhər Gənclər və İdman Baş İdarəsinin əməkdaşı Pərvin Rəsulov gənclərin fərdi layihələrinin önəmini diqqətə çatdırıb, belə təşəbbüslərə göstərilən dəstəyin vacibliyini qeyd edib. Bildirib ki, cəmiyyətdə gənclər arasında oxu mədəniyyətinin inkişaf etdirilməsində təhsil müəssisələri ilə yanaşı, cəmiyyətin hər bir üzvü məsuliyyət daşıyır. Uşaq və yeniyetmələrə kitab sevgisi hələ erkən yaşlarından aşılanmalıdır.
Çıxışlarda dövlətimizin başçısının Sərəncamı ilə təsdiq edilmiş "Azərbaycan gəncliyi 2017-2021-ci illərdə” Dövlət Proqramının ölkədə gənclər siyasətinin daha səmərəli həyata keçirilməsi istiqamətində növbəti mühüm addım olduğu bildirilib.
Xəbərdən istifadə edərkən istinad etmək vacibdir.
