Bu suala cavab tapmaq üçün Xeberle.com olaraq şəhərimizin ziyalıları arasında sorğu keçirdik: Vaqif Nəzirov, monimentalist rəssam: "Dahi şairimizi də biznesmen etmək istəyiblər. Mənim sizə cavabım yalnız bu ola bilər”.

Rafiq Yusifoğlu, şair, yazıçı, tənqidçi, Azərbaycan Yazıçılar İttifaqının üzvü: "Burada heç bir qəbahət görmürəm. Abidə bazarın içərisində deyil, çölündədir. Təki elə heykəl qoyulsun. Ora camaatın gur olduğu yerdir. Heç olmazsa, insanlar alverdən başını qaldıranda dahi şairimizi görsünlər. Ən vacib şərt Nizami Gəncəvinin yaradıcılığının təbliğ olunmasıdır. Bizim övladlarımız bilirlərmi ki, o heykəl kimə məxsusdur, nə üçün qoyulub, Nizami Gəncəvinin hansı əsərləri var?! Düşünürəm ki, gündəmdə əsas bunun təbliği məsələsi olmalıdır. Təkcə heykəl ilə iş həll olunmur”.

Aida Eyvazlı, jurnalist: "Ümumiyyətlə Sumqayıtda da şairlər, böyük şəxsiyyətlər üçün park salınsaydı, yaxşı olardı. Hətta bizim Monteneqrodakı səfirimiz Eldar Həsənov orada bizim şəxsiyyətlərimizin heykəllərinin ucaldıldığı park yaratdı. Amma şəhərimizdə belə bir park yoxdur. Dahi şairimizin heykəlinin bazar yaxınlığında ucaldılması arzuolunmaz haldır”.

Əşrəf Veysəlli, şair: "Fikrimcə, bazar ətrafı dahi şairimizin heykəlinin ucaldılması üçün münasib yer deyil. Amma bunu da unutmaq olmaz ki, şairlər hər yerin yaraşığıdır. Orada da sənət nümunəsi olsa, nə olar ki?!”.

Ofelya Babayeva, Azərbaycan Yazıçılarım Birliyinin üzvü, şair: "Əlbəttə ki, daha böyük bir mədəniyyət parkında qoyulsaydı, yaxşı olardı. O vaxt bizim bulvarımız yox idi, yəqin ki, ona görə belə fikirləşiblər. Məsələn, mən istəyərdim ki, həmin heykəl təzə bulvarımızda ucaldılsın. Amma hesab edirəm ki, heykəlin harada olmasənən elə bir fərqi yoxdur. Əsas odur ki, sağ olsun, sumqayıtlılar, hörmət əlaməti olaraq böyük həmyerlilərinə heykəl ucaldıblar”.

Eyruz Məmmədov, jurnalist: "Dünyanın bir çox ölkəsində bazarlara yaxın heykəllər var. Buna Almaniyanı və Avstriyanı misal göstərmək olar. Amma burada əsas məsələ bazar ətrafının sanitar vəziyyətidir. İkinci məsələ isə dahi şairimizin heykəlinin qoyuluşudur. Çünki Nizami küçəsi şairimizin heykəlindən 50 metr uzaqda yerləşən sülh küçəsindən başlayır. Buna görə də, heykəlin üzü sülh küçəsinə deyil, 2-ci mikrorayon tərəfə baxmalı idi. Mən əsas buna narazılıq edirəm. Düzdür daha görkəmli yerə qoyulsaydı yaxşı olardı. Bununla yanaşı, mənim ziyalı kimi etirazım həmişə Üzeyir Hacıbəyova yalnız büst qoyulmasına olub. O boyda tarixi şəxsiyyətə heykəl qoyulsaydı, yaxşı olmazdımı?! Şəhərdə heykəllərin çox olması həmin şəhərin, dövlətin mədəniyyətindən xəbər verir”.

İbrahim İlyaslı, Azərbaycan Yazıçılar Birliyinin üzvü, şair: "Abidə ora qoyulanda dahi şairimizin adı düz yazılmamışdı, daha sonra düzəldildi və ətrafı abadlaşdırıldı. Əlbəttə ki, orada insanların çoxluğu və ətrafında ticarət mərkəzlərinin olması ilk baxışda məndə də elə təəssürat yaradır ki, heykəl başqa yerdə ucaldılsaydı, daha yaxşı olardı. Amma ora da şəhərimizin mərkəzidir, ətrafı daha da gözəlləşdirilsə, heykəl orada qala bilər. Çünki abidə köçürmək elə də asan iş deyil”.

Sumqayıtın ziyalıları ilə yanaşı şəhər sakinlərinin də fikirlərini öyrənmək üçün onlar arasında sorğu apardıq və sualımızı cavablandıranların əksəriyyəti abidənin bazar ətrafında olmasının əleyhinə olduqlarını bildirdilər.