İslam dinində Məhəmməd peyğəmbər və onu Əhli-Beytinə salavat çəkmək müstəhəb əməllərdəndir və savab əməl kimi qeyd olunur.
İnsanların təzə Ayı gördüklərində salavat çevirməsi də adət halını alıb.
Bəs İslamda bunun bir əsası varmı?
İlahiyyatçı Elvüsal Məmmədov Modern.az-a açıqlamasında bildirib ki, insanların Ayı görüb salavat çevirməsi adətinin İslam dinində heç bir əsası yoxdur:
"Vaxtilə peyğəmbərimizin oğlu İbrahim vəfat etdiyi gün Günəş tutulması baş vermişdi. Bu hadisəni peyğəmbərin oğlunun vəfatı ilə əlaqələndirənlərə cavabı peyğəmbərimizin özü vermişdi ki, bu Allah-Təalanın qoyduğu bir qanunauyğunluqdur. "Bu hadisənin oğlumun vəfatı ilə heç bir əlaqəsi yoxdur” demişdi. Ümumiyyətlə Günəş və Ay görəndə salavat çevirmək birbaşa  xalqımıza məxsus ənənədir,buna "xalq dini” də demək olar”.
 
"Məşədi Dadaş” məscidinin imam-camaatı Hacı Şahin Həsənlinin sözlərinə görə, İslamda Ayı,Günəşi görərkən salavat çevirmək kimi adət olmayıb:
"Bu sadəcə insanların  Quranda bəhs edilən " Şəqqül-qəmər”, yəni  " Ayın bölünməsi” möcüzəsini yad etməsi ilə bağlıdır. Bu yolla onlar peyğəmbərə salam göndərirlər. Bu özü əslində müsbət bir adətdir, burada mənfi nəsə yoxdur. Əksinə,insanlar peyğəmbəri yad etməklə savab qazanır. Düzdür, dində belə bir qayda yoxdur,amma bu əməl dinə zidd də deyil”.
 
İlahiyyatçı Elşad Mahmudov isə qeyd edib ki, bu ancaq milli adət-ənənə ilə əlaqəli bir məsələdir:
"Dində Ayı görəndə salavat götürmək kimi bir qayda-qanun yoxdur.Və mənim fikrimcə, dində olmayan nəyisə etmək doğru əməl kimi sayıla bilməz”.
 
Kinorejissor, ssenarist  Əbdül Mahmudov açıqlamasında qeyd etdi ki,insanlar Azərbaycanda vaxtilə Günəşə, Aya sitayiş edirdilər.
"Bu gün Ay görəndə, Günəş görəndə salavat çevirmək adəti bu adət-ənənələrlə bağlıdır:  İnsanlar yeni görünən Ayı, Günəşi görərkən bunu Allahdan gələn bir işıq,nemət, nur kimi qəbul edib təşəkkür əlaməti olaraq salavat çevirirlər”.

Xəbərdən istifadə edərkən istinad etmək vacibdir.