Artıq Yeni 2018-ci ilin ilk - yanvar ayını yaşayırıq. 2017-ci il ərzində Sumqayıtda müxtəlif hadisələr baş verdi. Maraqlıdır, sumqayıtlıların xatirində ötən il nələrlə yadda qalıb?
İlin əsas faciəvi hadisəsi mart ayının 9-da Bakı-Sumqayıt yolunda baş verən qəzayla başlayır. Hadisə nəticəsində 17 nəfər xəsarət almış, 6 nəfər isə dünyasını dəyişmişdir. Onların hamısı Sumqayıt Dövlət Universitetinin tələbələri idi. Qəza nəticəsində vəfat edənlərin yaxınlarına bir daha başsağlığı veririk.
Uzun illər baxımsız vəziyyətdə olan Şərq bazarının sökülməsi may ayının 15-dən başlanılmışdı. Bazarın yerində isə müasir ticarət mərkəzi Şərq MALL-ın tikilməsi nəzərdə tutulub.
İyun ayı isə Sumqayıtlıların yaddaşında uşaqlar arasında kütləvi zəhərlənmənin baş verməsi ilə yadda qalmışdı. Çoxu bunun səbəbini suda görsə belə, Səhiyyə Nazirliyinin mətbuat xidməti zəhərlənməsinin səbəninin rotaviarus virusunun olduğu bildirilmişdi. Bu virus fəsil dəyişkənliyə ilə əlaqədar peyda olmuşdu.
İyul ayının 1-də isə Sumqayıtın informasiya yükünü çəkən xəbər saytı - Xeberle.com-un 5 yaşı tamam oldu və bu münasibətlə geniş yubiley tədbiri təşkil edildi. Qeyd edək ki, bu xəbər portalı təsis edildiyi gündən Sumqayıtda baş verən hadisələri gündəlik olaraq ictimailəşdirməklə yanaşı, ölkədə, dünyada baş verən hadisələri də işıqlandırmışdır.
Sumqayıtda il ərzində müxtəlif yanğın hadisələri baş verib. Onların arasından daha çox yaddaqalan isə avqustun 5-də, 43-cü məhəllədə məcburi köçkünlərin yaşadığı yataqxanada baş vermişdi. Hadisə nəticəsində 114 ailənin yaşadığı binadan 40 nəfər təxliyyə olunmuşdu. Xoşbəxtlikdən hadisə nəticəsində ölənlər olmasa belə, xəsarət alan və zəhərlənənlər olmuşdu. Qeyd edək ki, yataqxana sakinlərinin yeni evlərlə təmin olunması planlaşdırılıb və bu istiqamətdə işlər hələ də gedir.
Sumqayıt bulvarı tikilməmişdən əvvəl böyük səs salmağı bacarmışdı. Bulvarımız müxtəlif mükafatlar qazanmışdı. 17 oktyabr isə bulvarımız daha bir mükafat "Global Trade Leaders” klubunun "Keyfiyyətə görə Beynəlxalq Avropa mükafatı”na (International Europe Award for Quality) layiq görülüb.
2017-ci ildə müxtəlif Sumqayıt ziyalıları vəfat etdi. Onların arasında hamını çox üzən isə oktyabrın 20-də dünyaya gözlərini əbədi yummuş "Şöhrət" ordenli pedaqoq Minarə Tahirovanın vəfatı idi. Xeberle.com olaraq Minarə müəllimənin yaxınlarına bir daha dərin hüznlə başsağlığı veririk.
Noyabr ayının 1-də Azərbaycanın qrossmeysteri olan sumqayıtlı Şəhriyar Məmmədyarov FİDE-nin cari reytinqində ikinci yerə yüksəlmişdi. O, FİDE reytinqində belə yüksək pilləyə qalxan ilk azərbaycanlıdır.
Dekabr ayı üçün ən yaddaqalan hadisə isə prezident İlham Əliyevin Sumqayıta səfəri oldu. Ölkə başçısı 15 dekabrda YAP-ın Sumqayıt şəhər təşkilatının inzibati binasının, Bayraq Muzeyinin, Boruyayma zavodunun, Kimya Sənaye Parkında "STDC” Məhdud Məsuliyyətli Cəmiyyətinin Məlumatların Emalı, Qeydə Alınması və Ötürülməsi Mərkəzinin açılışında iştirak edərək, istehsal müəssisələrini işə salmış və yeni obyektlərin təməlini qoymuşdu.
Xeberle.com olaraq sizi 2018-ci ilin gəlişi ilə təbrik edir, yeni ildə uğurlar arzulayırıq!
Hicranə İsmayılova
Xəbərdən istifadə edərkən istinad etmək vacibdir.
