Azərbaycanda şagirdləri oxumağı və yazmağı bacarmayan rayonların adları açıqlanıb. Tələbə Qəbulu üzrə Dövlət Komissiyasından  verilən məlumata görə, 2013-cü ildə buraxılış imtahanlarında 203907 nəfər iştirak edib. Onların 117275 nəfəri 9-cu, 86632 nəfəri isə 11 sinif şagirdləri olub. Ötən il respublika üzrə 9-cu və 11-ci sinif şagirdlərinin sayı müvafiq olaraq 121543 və 88697 nəfər olub. Bu isə buraxılış imtahanlarında bu və ya digər səbəblərdən 633 nəfər şagirdin iştirak etməməsi deməkdir.

Buraxılış imtahanlarında iştirak edən 9-cu sinif şagirdlərinin 67.96 faizi ana dili fəni üzrə, 69.90 faizi riyaziyyat fənni üzrə, 58.41 faizi bütün fənlər üzrə müsbət qiymət alıb. Qeyd olunan imtahanda iştirak edən 11-ci sinif şagirdlərinin 80.10 faizi ana dili fənni üzrə, 80.01 faizi riyaziyyat fənni üzrə, 72.14 faizi bütün fənlər üzrə müsbət qiymət alıb.

“Acınacaqlı haldır ki, 9-cu və 11-ci siniflərin şagirdləri arasında nəinki minimal tədris proqramını mənimsəməyənlər, hətta oxumağı və yazmağı bacarmayanlar da aşkar olunub. Belələri 11-ci sinif şagirdləri arasında 5 nəfər, 9-cu sinif şagirdləri arasında isə 44 nəfər olub. Bu cür halların imtahan protokollarında heç də həmişə qeydə alınmadığını nəzərə alsaq, yuxarıda göstərilən faktların əslində daha çox olduğunu ehtimal etmək olar”.

TQDK-dan verilən məlumata görə, belə şagirdlərin hansı bilik və bacarıqlar sayəsində 9 və 11-ci siniflərə gəlib çıxması müəmmalıdır.      

Oxumağı və yazmağı bacarmayanlar Şəmkir, Gədəbəy, Ağstafa, Goranboy, Kürdəmir, Sabirabad, Daşkəsən, Bərdə, Ağdaş, Salyan, Ağdam, Beyləqan, Tovuz, Göyçay, Neftçala, Qobustan və Füzuli rayonlarının payına düşür.

2013-cü ildə buraxılış imtahanında 9-cu sinif şagirdlərinin 33.47 faizi Azərbaycan dilindən, 30.10 faizi riyaziyyat fənnindən  ”iki” qiyməti alıb.

11-ci sinif şagirdlərinin 21.20 faizi Azərbaycan dilindən, 19.99 faizi isə riyaziyyat fənindən “iki” qiyməti alıb. 

/lent.az./