Hazırda Bakının əsas ana yollarından olan Aeraport yolunda, Olimpiya stadionunun qarşısında sözügedən yolu daha qısa yolla Ziya Bünyadov prospektinə birləşdirəcək tunelin tikintisi gedir. Həmçinin Xətai rayonunda Məhəmməd Hadi küçəsi də təmirə bağlanıb.
Bundan başqa, Nəsimi və Nərimanov rayonları arasındakı və sözügedən rayonların əsas nəqliyyat arteriyasını təşkil edən Təbriz küçəsində, Əliyar Əliyev və Ağa Nemətulla küçələrinin kəsişməsi köklü şəkildə yenidən qurulur. Bütün bunlar azmış kimi, paytaxtda keçirilən idman oyunları ilə əlaqədar şəhərin Səməd Vurğun, Üzeyir Hacıbəyli və Xəqani küçələrində yolların asfalt örtüyü yenilənir.
Sadaladığımız yollar bir-biri ilə kəsişməsə də, təmir işlərinin eyni vaxtlarda aparılması günün pik saatlarında paytaxtın hər istiqamətində tıxac yaranmasına, sıxlıq olmasına səbəb olur.
Yol hərəkəti üzrə ekspert Ərşad Hüseynov Axar.az-a açıqlamasında bildirib ki, əslində sözügedən yollar bir-biri ilə paralel olmadığı üçün eyni vaxtda təmir işlərinin aparılması nöqsan deyil. Çünki həmin yollar bir-birinin alternativi hesab olunmur:
"Bu cür təmirlər zamanı həmin yolların alternativlərinin yüksək səviyyədə olmasına diqqət yetirilməlidir. Həmçinin bu cür məqamlarda işləri sürətli şəkildə aparmaq lazımdır. Şəhərin həm bu başında, həm də digər ucunda təmirə görə sıxlıq yaşanması yaxşı hal deyil. Nəzərə almaq lazımdır ki, onsuz da hər gün günün pik saatlarında sıxlıq yaşanan müəyyən yollar var. Təmirə görə sıxlıq daha da artır və paytaxt ümumilikdə tıxacda qalmış olur. Ona görə təmiri tez yükunlaşdırmaq, işləri sürətləndirmək mütləqdir”
Xəbərdən istifadə edərkən istinad etmək vacibdir.
