Günümüzdə enerji içkilərindən istifadə çox geniş şəkildə yayılıb. Onun insan orqanizminə nə kimi təsir etməsi məsləsi isə hələ də müzakirə mövzusu olaraq qalır.
Defektoloq Məftun Ənvəroğlu Xeberle.com-a açıqlamasında son zamanlar böyükdən kiçiyə hər kəsin əlində gördüyümüz enerji içkilərinin (red bull, hell, bizon və s.) xüsusilə uşaqlara və gənc qızlara verə biləcəyi böyük zərərlərdən danışıb:
"Son zamanlar məktəbli uşaqların və gənc qızların (potensial anaların) əllərində bu qəbildən olan içkiləri tez-tez görürəm. Bəli, içirlər spirtli və ya spirtsiz olan, tərkibində kimyəvi və qeyri-kimyəvi maddələrin olduğu, bəzəkli-düzəkli müxtəlif çeşidli bu nəsnəni. Deyəcəksiniz ki, valideynləri hara baxırlar?! Deyərdim ki, valideynlər özləri adıçəkilən içkini alıb evə aparmaqla bu aludəçiliyi övladlarına da aşılamış olurlar. Bəli, bəli, valideynlər. Çünki valideyn içərkən uşaqda da dizaynı ilə göz oxşayan, mədə-bağırsaq sisteminə zərər vuran bu içkiyə meyil yaranır və əlinə pul düşdükdə elə ilk fürsətdəcə enerji içkisi alıb içir. O cümlədən də yeniyetmələrdə və gənclərdə... Və bu içkiyə gələcəyin anaları hesab olunan və sağlam nəsil gözlədiyimiz gənc qızların qurşanması isə daha böyük təəssüf hissi doğurur. Öz sağlamlığını şüurlu şəkildə şübhə altına salan, qidalanmasına fikir verməyən bu qəbildən olan qızların dünyaya gətirdiyi uşaqlarda təbii ki, mədə-bağırsaq xəstəlikləri, nevroloji, əqli və müxtəlif nitq problemləri təzahür edəcək. Hər halda bu içkinin daha böyük fəsadları bir neçə ildən sonra ortaya çıxacaq”.
Elnarə Salamova
Xeberle.com
Xəbərdən istifadə edərkən istinad etmək vacibdir.
