Ermənilər tərəfindən girov götürülmüş Dilqəm Əsgərov və Şahbaz Quliyevə işgəncələr verilməsi ilə bağlı məsələ daim diqqət mərkəzindədir.
Bu barədə Trend-ə açıqlamasında Dilqəm Əsgərovun vəkili Anar Bağırov bildirib.
Vəkil qeyd edib ki, bu barədə mütəmadi məlumatlar toplanaraq Avropa İnsan Haqları Məhkəməsinə göndərilir: "Ümid edirik ki, Avropa İnsan Haqları Məhkəməsi tez bir zamanda bu məsələ ilə bağlı ədalətli qərar qəbul edəcək. Bu hər bir Azərbaycan vətəndaşını narahat edən problemdir. Hesab edirəm ki, Avropa İnsan Haqları Məhkəməsi öz prinsiplərinə sadiq qalaraq bu məsələnin baxılmasını tezləşdirməlidir".
Beynəlxalq Qızıl Xaç Komitəsinin Şahbaz Quliyev və Dilqəm Əsgərovla sonuncu görüşü zamanı onların ailələrinə təqdim etdikləri videogörüntülərlə bağlı da sənədlərin hazırlandığını deyən Anar Bağırov bildirib ki, yaxın vaxtlarda həmin sənədlərin də toplanması başa çatacaq və bu sənədlər də Avropa İnsan Haqları Məhkəməsinə göndəriləcək".
Xəbərdən istifadə edərkən istinad etmək vacibdir.
