Xeberle.com xəbər verir ki, hüquqşunaslar, psixoloqlar, QHT nümayəndələrinin iştirak etdiyi təqdimat mərasimində "Qadın Təşəbbüsü və Sosial Problemlərin Həllinə Yardım” ictimai birliyinin sədri, layihənin rəhbəri Zenfira Mustafayeva çıxış edərək əsas məqsədin bu sahədə qabaqlayıcı tədbirlərin icrası, qurbanlara və potensial qurbanlara zəruri xidmətlərin göstərilməsi vasitəsilə insan alverinə qarşı mübarizənin gücləndirilməsində dövlət orqanlarına yardım göstərməkdən ibarət olduğunu vurğulayıb.

Z. Mustafayeva layihə çərçivəsində nəzərdə tutulmuş xidmətlər, benefisiarların əsasən kimlər olacağı, əhatə olunan çoğrafi zonalar barədə təqdimat iştirakçılarına geniş məlumat verib.

O, həmçinin bildirib ki, layihə çərçivəsində insan alveri mövzusunda 2 televiziya verilişinin, insan alveri ilə mübarizə sahəsində çalışacaq mütəxəssislər üçün 4 təlim və seminarın keçirilməsi nəzərdə tutulub.

Qeyd olunub ki, insan alveri qurbanlarına və potensial qurbanlara hüquqi, psixoloji,sosial yardımlar göstəriləcəyi və insan alverinə qarşı mübarizə, insan alveri qurbanlarının problemləri və oxşar digər mövzular üzrə ən yaxşı tədqiqat və yazı üzrə jurnalistlər arasında müsabiqə keçiriləcəyi barədə iştirakçılara geniş məlumat verib.

Layihənin rəhbəri bu müsabiqənin keçirilməsində məqsəd kütləvi informasiya vasitələrini insan alveri ilə mübarizəyə daha çox diqqət artırmağa sövq etmək olduğunu deyib.

Müsabiqənin qalibləri insan alveri ilə mübarizə aparan dövlət və ictimai qurumların nümayəndələrindən təşkil olunacaq xüsusi komissiya tərəfindən müəyyən olunacaq.

Qalib şəxs diplomla mükafatlandırılacaq.