Sumqayıt şəhər "Neftqazavtomat" Elmi İstehsalat Müəssisəsinin işçiləri neçə aydır ki, maaş ala bilmirlər. Bu barədə Xeberle.com-a birliyin bir qrup işçisi məlumat verib. Onların sözlərinə görə, mart ayından etibarən maaş ya heç verilmir, ya da az-az (20, 50,150 AZN) ödənilir. Maaşlarını tələb edən işçilərə isə "gedin kimə şikayət edirsinizsə, edin. Bizdə belədir” cavabı verilir. Şikayətçilər iddia edirlər ki, işdən çıxan işçi belə indiyə qədər əmək haqqını ala bilmir və o gələndə mühafizəçilərə tapşırılır ki, içəri buraxılmasın. Məsələ ilə bağlı birliyin baş mühəndisi Firat Cəfərov ilə əlaqə saxladıq.

F.Cəfərov bildirdi ki, mart ayının maaşları işçilərə tam şəkildə ödənilib: "Maaşlarla bağlı elə bir problem yoxdur. Biz əsas Azərbaycan Respublikasının Müdafiə Sənayesi Nazirliyindən və Neft Şirkətindən ödəniş əldə edirik. Ödənişin olunması üçün isə gərək onlara mal göndərək. İyun ayının 14-nə qədər aprel ayında əməkhaqqı almayanların pulu ödəniləcək. May və iyun ayının maaşları isə iyul ayın 4-6-sı veriləcək”.