Ölkə mətbuatının inkişafında vacib məqamlardan biri regional mətbuatın mövcudluğu, inkişafıdır. Xeberle.com da region mətbuatı olaraq bu inkişaf üçün var gücü ilə çalışır. Biz nə qədər şəhərimizdə baş verən hadisələr haqqında sakinlərə məlumat verməyə çalışsaq da, hər gün informasiya əldə etməklə bağlı qarşılaşdığımız problemlər fəaliyyətimizin effektlivliyinə mənfi təsir göstərir. Bəzən yaşadığımız regionla bağlı məlumat almaq üçün əlaqə yaratdığımız qurumlardan aldığımız cavablar və reaksiyalar bizi mənəvi olaraq yormaqla yanaşı, işə olan bağlılığımıza da təsir göstərir. Məsələn, bu yaxınlarda təhsillə bağlı məlumatı dəqiqləşdirmək üçün Sumqayıt şəhər Təhsil İdarəsində müdir əvəzi fəaliyyət göstərən Ramin Abasov ilə əlaqə saxlamışdıq. Bizə yarım saat ərzində məlumat verəcəyini bildirdi. İş gününün sonuna qədər əlaqə saxlamağa çalışsaq da, zəngimizə cavab verilmədi. Xəbərdə balanslılıq qorunmadığı, informasiya rəsmi təsdiqini tapmadığı üçün məcburən onu yayımlamadıq. Dünən yenə redaksiyamıza daxil olan informasiyanı dəqiqləşdirmək üçün sözügedən şəxslə əlaqə saxladıq. Gün boyu telefonumuza xəttin məşğul olduğu bildirildi. Nəhayət hər şey bu gün məlum oldu ki, redaksiyamıza aid olan bütün telefon nömrələri bloklanıb. Səhər saatlarında yenə telefon xəttinin məşğul olduğunu gördüyümüz üçün tamamilə yad bir nömrə ilə R.Abasova zəng etdik və yalnız bundan sonra məlum oldu ki, əslində ona zəng edə bilməməyimizin səbəbi nömrələrimizin bloklanmağı imiş. Bəli, işimizi görməyə çalışdığımız üçün əngəllənmiş, "İnformasiya əldə etmək haqqında” Azərbaycan Respublikasının Qanununda göstərilən və dövlətimizin bizə tanıdığı bütün hüquqlarımız pozulmuşdu. Maraqlıdır, məqsəd nədir? İnformasiya verməyi istəməmək, buna ərinmək, yaxud sadəcə məsuliyyətsizlik? Bəlkə qurum rəhbərinin səlahiyyətlərini icra edən şəxs ümumiyyətlə informasiya əldə etmək barədə qanundan xəbərsizdir? Hər halda sualların sayı elə də çox deyil. Əsas odur ki, cavab birdir - "cavab vermirəm"!
Elnarə Salamova
Xeberle.com
Xəbərdən istifadə edərkən istinad etmək vacibdir.
