Xeberle.com-a verilən məlumata görə, tədbir iştirakçıları öncə ümummilli lider Heydər Əliyevin abidəsini ziyarət edib və xatirəsinə ehtiramlarını bildiriblər.

Yeni Azərbaycan Partiyası Sumqayıt Şəhər Təşkilatı gənclər ilə iş üzrə sədr müavini Elmar Xəlilov çıxış edərək Azərbaycanın hərb tarixindən, nizami ordu quruculuğu istiqamətində atılan addımlardan danışıb.

Bildirilib ki, 1918-ci il mayın 28-də qəbul edilmiş "İstiqlal bəyannaməsi"ndə qeyd edilirdi ki, Azərbaycan özünü xarici müdaxilələrdən müdafiə etmək, daxili düşmən qüvvələrini zərərsizləşdirmək üçün nizami orduya malik olmalı, özünün silahlı qüvvələrini yaratmalıdır: "Hökumət tərəfindən 25 min nəfərlik ordu yaratmaq vəzifəsi irəli sürüldü. Dövlət büdcəsinin 24 faizi hərbi məqsədlərə ayrıldı. Avqustun 1-də isə Hərb Nazirliyi təsis olundu. Azərbaycanın ilk müdafiə naziri Xosrov bəy Sultanov təyin edildi. Daha sonra onu bu postda general Səməd bəy Mehmandarov əvəzlədi. General-leytenant Əliağa Şıxlinski isə nazir müavini təyin edilmişdi. Qısa müddətdə Milli Ordu Osmanlı dövlətinin Qafqaz İslam Ordusu ilə birlikdə Bakını və ətraf qəzaları erməni-bolşevik işğalından azad etdi. Azərbaycan ordusunun Hüseyn xan Naxçıvanski, İbrahim ağa Usubov, Həmid Qaytabaşı, Kazım Qacar, Cavad bəy Şıxlinski, Həbibbəy Səlimov kimi generalları olub".

Azərbaycanın yenidən - 1991-ci ildə müstəqillik əldə etdikdən sonrakı dövrdə əldə etdiyi uğurlardan, ordunun formalaşdırılması və inkişaf etdirilməsi istiqamətində atılan addımlardan da bəhs edilib: "Ümummilli lider Heydər Əliyevin Azərbaycana qayıtması və möhkəm iradəsi sayəsində 1994-cü ildə ölkədə atəşkəsə nail olunduqdan sonra ordu quruculuğu istiqamətində böyük işlər görülüb. Bu gün isə Prezident, Ali Baş Komandan İlham Əliyevin diqqət və qayğısı nəticəsində dövlətimizin etibarlı müdafiəsi tam təmin olunub."

"N" saylı hərbi hissənin rəhbər heyətindən zabit Sarvan Qurbanov YAP Sumqayıt Şəhər Təşkilatı sədrinin gənclər ilə iş üzrə müavini Elmar Xəlilov və Gənclər Birliyinin üzvlərinə təşəkkürünü bildirərək Fəxri Fərmanla təltif edib.