Fövqəladə Hallar Nazirliyinin Mülki müdafiə işinin təşkili Baş idarəsinin təşkilatçılığı ilə Sumqayıt Şəhər İcra Hakimiyyətində Fövqəladə Hallar Nazirliyinin 25.05.2018-ci il tarixli 031 nömrəli əmrinə uyğun olaraq Sumqayıt şəhərində keçirilmiş mülki müdafiənin vəziyyətinin kompleks yoxlanılmasının nəticələrinə dair müşavirə keçirilib.
Xeberle.com-un xəbərinə görə, müşavirənin keçirilməsində məqsəd aparılmış yoxlamanın nəticələrinin təhlil edilməsi, mülki müdafiə sahəsində şəhər ərazisində aşkar edilmiş problem və çatışmazlıqların aradan qaldırılması yollarının müzakirəsi, habelə mülki müdafiə işinin təşkilində səmərəliliyin artırılması məqsədilə Sumqayıt şəhəri ərazisində fəaliyyət göstərən mülkiyyət formasından asılı olmayaraq idarə, müəssisə və təşkilatlar, o cümlədən Fövqəladə Hallar Nazirliyinin yerli strukturları və yerli icra hakimiyyəti orqanları arasında qarşılıqlı fəaliyyətin təkmilləşdirlməsindən ibarət olub. Tədbirdə Mülki müdafiə işinin təşkili Baş idarəsinin rəisi general-mayor Niyazi Zamanov və baş idarənin məsul vəzifəli əməkdaşları, Sumqayıt Şəhər İcra Hakimiyyəti başçısının birinci müavini – şəhər Fövqəladə Hallar Komissiyasının sədri Teymur Səmədov və icra başçısının digər müavinləri, şəhərin əhatə etdiyi ərazidə mülkiyyət formasından asılı olmayaraq idarə, müəssisə və təşkilatların rəhbərləri və mülki müdafiəyə cavabdeh şəxsləri (qərargah rəisləri) iştirak ediblər.
Tədbirdə çıxış edən general-mayor Niyazi Zamanov Sumqayıt şəhərində keçirilmiş mülki müdafiənin kompleks yoxlanılması və yoxlamanın nəticələri, habelə aşkar edilmiş problem və çatışmazlıqlar barədə məlumat verib. O, öz çıxışında mülki müdafiə işinin təşkili zamanı əsas diqqətin mərkəzi və yerli icra hakimiyyətləri, yerli özünüidarəetmə orqanları, eləcə də təsərrüfat obyektlərində (idarə, müəssisə və təşkilatlarda) mülki müdafiənin təbliği, əhalinin mülki müdafiəyə hazırlanması və mülki müdafiə qüvvələrinin daimi hazırlığının təmin edilməsinə və digər istiqamətlərə yönəldilməsinin zəruriliyini qeyd edib.
Natiq əlavə edib ki, Sumqayıt şəhərində mülki müdafiə işində səmərəliliyin daha da artırılması istiqamətində şəhər ərazisində fəaliyyət göstərən mülkiyyət formasından asılı olmayaraq, idarə, müəssisə və təşkilatlar ilə Fövqəladə Hallar Nazirliyinin yerli qurumları arasında qarşılıqlı fəaliyyətin gücləndirilməsi mühüm əhəmiyyət kəsb edir.
Tədbirdə çıxış edən Sumqayıt şəhər icra hakimiyyəti başçısının birinci müavini – şəhər Fövqəladə Hallar Komissiyasının sədri Teymur Səmədov səslənən fikirlərə şərik olduğunu bildirmiş və keçirilmiş yoxlama nəticəsində aşkar edilmiş problem və çatışmazlıqların aradan qaldırılması üçün zəruri addımların atılacağını diqqətə çatdırıb.
Xəbərdən istifadə edərkən istinad etmək vacibdir.
