Bu gün Sumqayıtda fəaliyyət göstərən Xeberle.com saytının 6 yaşı tamam olur. 2012-ci ilin iyun ayının 28-dən etibarən fəaliyyətə başlayan sayt Sumqayıt şəhərinin həyatını, gündəlik qayğılarını, sosial-ictimai, mədəni fəaliyyəti və gündəlik hadisələri ictimaiyyətə çatdırır. Bəs görəsən jurnalistlər, şəhərimizin tanınmış simaları Xeberle.com-un fəaliyyətindən nə dərəcədə razıdırlar?
Mehman Şükürov, Sumqayıt Regional Mədəniyyət İdarəsinin rəisi: "Xeberle.com saytı istər şəhərimizdə, istərsə də ölkə miqyasında tanınmış aparıcı xəbər saytlarından biridir. Sevindirici haldır ki, 3 ildən artıqdır ki, əməkdaşlıq etdiyimiz saytla yalnız xəbər daşıyıcısı kimi deyil, mədəniyyət sahəsində birgə layihələrin müəlllifi olaraq da çalışmışıq. Ümid edirik, bu çalışmalarımız bundan sonra da davam edəcək, birgə daha böyük layihələrə imza atacağıq. Mədəniyyət işçilərinin əziz dostuna çevrilən, xəbər və hadisələrin operativ, obyektiv və qərəzsiz işıqlandırılması ilə özünə kifayət qədər oxucu kütləsi toplayan "Xeberle.com” saytını təbrik edir, media məkanında daha böyük uğurlar qazanmasını diləyirik!”
Qulu Məhərrəmli, professor, media eksperti: "İnformasiya mənbələrinə yaxın olmaq, auditoriyanı gərəkli məlumatlarla təmin etmək baxımından regionda media qurumu və jurnalist olaraq çalışmaq, oxucuları informasiya ilə daim təmin etmək çətindir. Mən hələ tənqid yazıb araşdırmalar aparmağın asan olmadığını, müxtəlif mövzularda sorğular aparmağın çətinliklərini demirəm. Amma nə yaxşı ki, bu çətinliklərə baxmayaraq Xeberle.com saytının işgüzar əməkdaşları 6-cı ildir ki, bu işin öhdəsindən peşəkarkıqla gəlməyə, oxuculara dəqiq, dolğun, qərəzsiz xəbərlər çatdırmağa çalışırlar. Bu çətin və şərəfli işdə həmkarlarıma uğurlar arzulayıram. 6 deyil, 60 ilinizi qeyd edəsiniz”.
İbrahim İlyaslı, Sumqayıt şəhər Əli Kərim adına Poeziya Evinin direktoru: "Sizin necə dəqiq və qərəzsiz çalışmağınız mənə elə gəlir ki, hər kəsə məlumdur. Şəhərimizdə baş verən mədəni hadisələri hamıdan tez və daha dəqiq işıqlandırmağınızın dəfələrlə şahidi olmuşuq. Eyni zamanda Sumqayıt Poeziya Evində keçirdiyimiz tədbirlərdə nümayəndənizin iştirak etməyi və ədəbi-bədii proseslərin ölkə ictimaiyyətinə çatdırılmasında zəhmətiniz danılmaz və təqdirəlayiqdir. Bu gün saytınızın yaranmasının 6 ili tamam olur. Bu 6 ildəki qüsursuz və operativ xidmətinizə görə, sizi Əli Kərim adına Poeziya Evinin əməkdaşları və şəhər ədəbi ictimaiyyəti adından təbrik edir, heyətinizə can sağlığı, saytınıza isə daha da böyük nailiyyətlər arzu edirəm”.
Aidə Eyvazlı, jurnalist: "Bizim atalar sözlərimiz həyatımızı, məişətimizi elə doğru, elə düzgün ifadə edir ki. Belə bir məsəl var: "Görünən dağa nə bələdçi!". Bu gün 6 yaşı tamam olan "Xəbərlə.com" portalı qlobal və qarmaqarışıq internet saytları içərisində seçilən və sevilən bir REDAKSİYADIR! çünki saytın necə işlədiyi, nə hazırladığı redaksiya heyətindən, baş redaktordan asılıdır. Şəhərimizin, sonra da ölkəmizin bu gənc və istedadlı kollektivi, jurnalist peşəkarlığını rəhbər tutaraq işləyir, yüngül senssasiyaların arxasınca qaçmır. Cəmiyyət varsa, problemlər də var. Bu gün hətta redaksiyaya yeri gəldi-gəlmədi edilən müdaxilələrdən belə çəkinməyərək, şəhərin illərlə yığılıb qalan problemlərini bir dəfə deyil, əksər hallarda həll olunub, aradan qaldırılana qədər problemi gündəmdə saxlamağı bacarırlar. Xəbərlə.com təkcə xəbər vermir, təhlil edir, nəticə çıxarır, portret çəkir, köməyə çatır, ümid yeri olur. Sizə ümidlərimiz böyükdür! İllər qanadlarınızı bərkitsin, şahin kimi ucalarda uçun. Sözə dəyər verən, sözü uca tutan, əziz həmkarlarım, hər zaman sizin yanınızda olmaqdan, bu portalda yazılarımın, imzamın getməsindən qürür duyuram. Yaxşı ki, varsınız! Yolunuz daim açıq olsun, sizə mane olanlara tanrı yardım edən deyil. Tanrı doğru sözü sevər, haqq edənlərin haqqını verər. Tanrı haqqınızı versin!".
Rafiq Oday, «Azərikimya» İstehsalat Birliyinin mətbuat xidmətinin rəhbəri, şair, publisist: "Təsis olunduğu ilk gündən Xeberle.com-un fəaliyyətini təqdir edənlərdən, yüksək qiymətləndirənlərdən biri olmuşam. İlk vaxtlar haqlı tənqidlərinə, yazılarına görə bu informasiya saytına münasibət birmənalı deyildi. Amma daha sonra işıqlandırılan məsələlərin sakinlərin xeyrinə öz həllini tapması - sayta olan münasibəti də dəyişməyə başladı. İnsanlar anlamağa başladılar ki, bu portal öz mənafeyini güdmür, əsas məqsəd şəhərdəki problemlərin aradan qalxmasıdır. Artıq Xeberle.com saytı sumqayıtlılar tərəfindən həm sevilir, həm də izlənilir. Düşünürəm ki, sorğu keçirilsə, sakinlərin 80-90 faizi şəhərimizlə bağlı məlumatları Xeberle.com vasitəsilə əldə etdiklərini deyərlər. Saytda fəaliyyət göstərən hər kəs mənə doğmadır, mövqelərini bəyənir və alqışlayıram. Xeberle.com jurnalistikamızın, mətbuatımızın xeyri istiqamətində çalışan bir saytdır. 6 yaşınız mübarək olsun. Sizə uğurlar arzu edirəm. Sükanı belə saxlayın!”
Mətanət Məhərrəmova, Qızıl Aypara Cəmiyyətinin Sumqayıt bölməsinin rəhbəri: "Xeberle.com saytıyla əməkdaşlığımız demək olar ki, onların yaşı ilə eynidir. Bu xəbər portalı dürüst, obyektiv, qərəzsiz və çevikdir. Portalın əməkdaşlarına möhkəm cansağlığı, çətin və şərəfli peşələrində uğurlar arzulayıram! Gün o gün olsun, 60 illik yubileylərini qeyd eləsinlər!
Rafiq Yusifoğlu, şair, yazıçı, tənqidçi: "Xeberle.com saytının kollektivini 6 il bizi gərəkli, düşündürücü informasiya elə təmin etdiyinə görə təbrik edirəm. Arzulayıram ki, qələbə müjdəsini bizə verən ilk saytlardan biri siz olasınız! Yeni uğurlar, ən gərəkli xəbərləri seçib ən gözəl tərzdə təqdim eləmək səriştəsi arzulayıram!”
Qeyd edək ki, Portal Sumqayıtda yaşayan 3 jurnalist: Elnur Ağayev, Kamal Almuradlı və Ramil Zeynallının təşəbbüsü ilə təsis edilib və aktiv regional internet resursu hesab edilir.
Elnarə Salamova
Xeberle.com
Xəbərdən istifadə edərkən istinad etmək vacibdir.
