Bu gün səhər saat 08:15 radələrində Sumqayıt şəhər Nəsimi adına Mədəniyyət və İstirahət Parkında məişət tullantılarının yandırılması orada istirahət edən sakinlərin narazılığına səbəb olub. Xeberle.com-un verdiyi məlumata görə, hadisə Şəhidlər Xiyabanı ilə Göyərçin abidəsi arasında olan ərazidə baş verib. Belə ki, sakinlərin narazılığına məhəl qoymayan şəxslər tullantıların yandırılmasına davam ediblər. Məsələ ilə bağlı məlumat əldə etmək üçün Sumqayıt şəhər 4 saylı Ərazi Ekologiya və Təbii Sərvətlər Şöbəsi ilə əlaqə saxladıq. Şöbənin ətraf mühitin monitorinqi və ekoloji təbliğat sektorunun müdiri Asəf Bayramov bildirdi ki, son günlər parkda tullantıların yandırılması ilə əlaqədar şöbəyə heç bir məlumat daxil olmayıb:

 

"Bizim şöbə tərəfindən tullantıların yandırılması ilə bağlı mütəmadi olaraq tədbirlər görülür. Son günlər parkda tullantıların yandırılması ilə əlaqədar bizə məlumat daxil olmayıb. Elə bir hadisə olduğu təqdirdə İnzibati Xətalar Məcəlləsinin 271-ci maddəsinə müvafiq olaraq fiziki şəxslərə 600-800 AZN cərimə tətbiq olunur”.