"Yay mövsümünün gəlişi ilə əlaqədar olaraq digər yerli icra strukturları kimi Fövqəladə Hallar Nazirliyi (FHN) (Kiçik Həcmli Gəmilərə Nəzarət və Sularda Xilasetmə Dövlət Xidməti) də gücləndirilmiş iş rejimində çalışır. Dövlət xidməti olaraq su hövzələrində, çimərlik zonalarında və digər sututarlarda dalğıc-xilasetmə və axtarış işlərini, insanların sularda təhlükəsizliyinin təmin olunmasına nəzarəti və əlaqələndirməni həyata keçirir, insanların axtarışı və xilas edilməsini təmin edir”.

 

Bu sözlər Xeberle.com-a Fövqəladə Hallar Nazirliyinin Sumqayıt Regional Mərkəzinin mətbuat xidməti tərəfindən bildirilib. Məlumata əsasən, hazırda xidmətin Sumqayıt şəhəri üzrə yerləşən çimərlik-sahil zolağında 5 müvafiq xilasetmə məntəqəsi fəaliyyət göstərir:

 

"Xidmətin ölkə üzrə təyin olunmuş zonalarda müvafiq xilasetmə məntəqələri fəaliyyət göstərir. Bu məntəqələrdə növbə çəkən peşəkar xilasetmə dalğıc qrupları dənizkənarı ərazilərdə, çimərlik zonalarında istirahət edən, dincələn, vətəndaşların təhlükəsizliyinin keşiyində ayıq-sayıq dururlar. Nazirliyin Sumqayıt Regional Mərkəzi də şəhər ərazisində mövcud su hövzələrində, sahil zolağında vətəndaşların təhlükəsizliyinin təmini istiqamətində Nazirliyin Kiçik Həcmli Gəmilərə Nəzarət və Sularda Xilasetmə Dövlət Xidməti ilə birgə müvafiq maarifləndirici tədbirlər təşkil edir, sakinlərin, istirahət edən vətəndaşların təlimatlandırılması istiqamətində əməli işlər həyata keçirir. Xidmətin Sumqayıt şəhəri üzrə yerləşən çimərlik-sahil zolağında 5 müvafiq xilasetmə məntəqəsi fəaliyyət göstərir. Həmin məntəqələrdə xüsusi bilik və bacarıqlara malik olan çevik, operativreaksiyavermə qabiliyyətinə malik böyük təcrübəyə yiyələnmiş kadrlar fəaliyyət göstərir. Səhər saat 09.00-dan 21.00-dək növbəli rejimdə çalışırlar və adıçəkilən məntəqələrin xidməti ərazilərində istirahət edən, dincələn, suda çimən vətəndaşların təhlükəsizliyini təmin edirlər. Hər bir məntəqə yerləşdiyi ərazi üzrə 500 metr sağ və sol istiqamətdə çimərlik üçün qanuna müvafiq olaraq rəsmi şəkildə icazəsi olan dəniz sahili zolağında xidmət aparır ki, vətəndaşlara da məhz bu ərazilərdə istirahət edib çimməkləri tövsiyyə edilir”.

 

Qeyd olunub ki, xidmət əməkdaşları qış mövsümündə də operativ olaraq xidmət göstərirlər:

 

"Xidmət əməkdaşları mütəmadi olaraq çimərlik mövsümü ilə əlaqədar olaraq sututar yerlərdə insanların təhlükəsizliyini təmin etmək məqsədi ilə profilaktik tədbirlər keçirir, öz təlimat və göstərişlərini verirlər. Onlar yalnız yay aylarında deyil, eyni zamanda qış mövsümündə də operativ olaraq xidmət göstərirlər. Hər il yay mövsümü açıq elan olunmazdan qabaq Sumqayıt Regional Mərkəzi ilə müvafiq Xidmət və yerli icra strukturlarının birgə iştirakı ilə geniş müşavirələr təşkil edirlər. Bu cür tədbirlərdə məhz sahil zolağındakı mövcud vəziyyət və problemlər müzakirə olunur və onların operativ olaraq aradan qaldırılması istiqamətində praqmatik işlər həyata keçirilir. Eyni zamanda yerli KİV-lər və xəbər portalları vasitəsi ilə də vətəndaşların, yerli ictimaiyyətin məlumatlandırılması və maarifləndirilməsi həyata keçirilir ki, onların da rolu bu sahədə danılmazdır”.

 

FHN-in Sumqayıt Regional Mərkəzindən verilən məlumata görə, dənizdə boğulma hallarının qarşısının alınması üçün xüsusi tədbirlərin həyata keçirilir:

 

"Aparılan statistik araşdırılmalara görə adətən dənizdə boğulma faktları arasında üstünlük təşkil edəni içkili vəziyyətlərdə suya daxil olmaq hallarında özünü daha çox biruzə verir. Bu cür halların qarşısını almaq üçün xidmət tərəfindən çimərlik zonalarında qadağanedici nişanlar, xəbərdarlıq lövhələri quraşdırılır, çimmək üçün nəzərdə tutulan ərazilər xüsusi avadanlıqların köməyi ilə işarələnir. Təəssüf ki, çox zaman vətəndaşlar bu cür qadağanedici lövhələrə məhəl qoymur, nəzərdə tutulmuş zonadan kənarda çimərək həyatlarını təhlükə qarşısına atırlar”.

 

Baş verən bu cür xoşagəlməz halların qarşısının alınması və vətəndaşların məsuliyyətini bu kimi məsələlərə qarşı daha da artırmaq üçün FHN aşağıda qeyd olunan təlimatları diqqətinizə çatdırır:

 

1. Vətəndaşlara tövsiyyə olunur ki, yalnız xilasetmə məntəqələri fəaliyyət göstərən ərazilərdə və saat səhər 09.00-dan axşam 21.00-dək çimərlik zonasında suya daxil olsunlar.

 

2. Ərazidə quraşdırılmış qadağanedici lövhə və tablolarda, məlumatverici nişanlarda göstərilən qaydalara riayət etsinlər.

 

3. Sərxoş halda suya daxil olmaq, suda kobud hərəkətlər etmək qəti qadağandır.

 

4. Küləkli havada dənizə girmək, işarələnmiş ərazilərdən kənara üzmək olmaz.

 

5. Üzmək qabiliyyətinə malik olmayan, xüsusilə də azyaşlıları nəzarətdən kənar qoymaq olmaz.

 

Bilrdirilib ki, əgər suda boğulma faktı aşkar olunarsa, mütləq ərazidə xidmət aparan peşəkar xilasedicilərə müraciət olunmalıdır. Hər bir kəs çalışmalıdır ki, boğulma hallarında zərərçəkənə ilkin köməklik göstərməyi bacarsın. Xüsusilə də hər bir vətəndaş ilkin tibbi yardım göstərməyi bacarmalıdır:

 

1. İlk növbədə boğulan şəxsi şaquli vəziyyətdə başıaşağı tutmaq və boğazına, qarnına dolan suyu boşaltmaq lazımdır.

 

2. Kürək hissəsinə yüngülcə vurmaq, döş qəfəsini öndən və arxadan sıxmaq lazımdır ki, ağ ciyərlərdən su daha tez xaric olsun.

 

3. Zərərçəkən özünə gəlməsə ona bu zaman ürək masajı və süni tənəffüs verilməlidir. Bu cür faktlarla rastlaşdıqda dərhal 103 nömrəsinə zəng vurulmalı təcili tibbi yardım çağırılmalıdır.

 

Qeyd edək ki, çimərlik zonalarında hər hansı bir təhlükəli vəziyyətlə qarşılaşdıqda və ya şahidi olduqda dərhal FHN-nin 24 saat fəaliyyət göstərən 112 Zəng Mərkəzinə və yaxud da yaxınlıqdakı xilasetmə məntəqələrinə məlumat vermək vacibdir.

Xeberle.com