"Bələdiyyələr arasında əlaqələrin
dərinləşdirilməsi istiqamətində tədbirlər həyata keçirilir. Keçiörən və
Sumqayıt bələdiyyələri arasında həyata
keçirilən layihələr bundan sonra da davam etdiriləcək. Bununla yanaşı,
qarşılıqlı təcrübə mübadiləsi istiqamətində də layihələrin reallaşdırılması nəzərdə
tutulur."
Bu sözləri Xeberle.com-a eksklüziv
açıqlamasında Türkiyənin Ankara şəhərinin Keçiörən rayonunun bələdiyyə sədri
Mustafa Ak deyib. M. Ak mütəmadi olaraq qarşılıqlı səfərlərin həyata
keçirildiyini də bildirib:" Hər il bizim təşəbbüsümüzlə Beynəlxalq Ramazan
şənlikləri keçirilir. Bu şənliklərdə Sumqayıtdan olan nümayəndə heyəti də
iştirak edir. Keçiörən bələdiyyəsi ərazisində Xocalı soyqırımı abidəsi
ucaldılıb. Gələcəkdə burada Azərbaycan Mədəniyyət Mərkəzinin açılması da görüləcək
işlər sırasındadır."
Bələdiyyə sədri açıqlamasında
Sumqayıta olan son səfərindən də söz açıb. Bildirib ki, o şəhərin sürətlə
inkişaf etdiyinin şahidi olub.
Mustafa Ak sumqayıtlılara müjdə də
verib: "Qarşılıqlı layihələr çərçivəsində Sumqayıtda "Keçiörən"
adlı parkın salınması da planlarımıza daxildir. Bununla bağlı şəhər rəhbərliyi
ilə danışıqlar aparılıb. Hazırda parkın
salınacağı ərazi müəyyənləşdirilir və müvafiq yerin ayrılması ilə bağlı işlər
gedir. Yer ayrıldıqdan sonra Keçiörən bələdiyyəsi tərəfindən parkın layihəsi
hazırlanacaq və müəyyən müddətdən sonra tikinti işlərinə start veriləcək.
Ümidvaram ki, bu park sumqayıtlıların sevimli məkanlarından birinə çevriləcək."
Xatırladaq ki, 2011-ci ildə Sumqayıt
şəhər bələdiyyəsi ilə Türkiyənin Keçiörən bələdiyyəsinin qardaşlaşmasına dair
protokol imzalanıb.
Elnarə Salamova
Xeberle.com
Xəbərdən istifadə edərkən istinad etmək vacibdir.
