Su insan həyatı üçün oksigendən sonra vacib olan ən önəmli qida mənbəyidir. İnsan yeməksiz həftələrlə yaşaya bilsə də, susuz yalnız bir neçə gün yaşamaq mümkündür. Son zamanlar havaların çox isti keçməsi suya olan tələbatı daha da artırıb. Bəs içdiyimiz suyun təmizliyindən nə dərəcədə əminik?
Xeberle.com olaraq sualımızı Sumqayıt şəhər Gigiyena və Epidemiologiya Mərkəzinin direktoru Rafiq Abdullayevə ünvanladıq. R.Abdullayev bildirdi ki, şəhərimizdə içməli su bütün standartlara cavab verir:
"Hər həftə içməli su nümunələri götürülərək onların üzərində laboratoriyada həm bakterioloji, həm də kimyəvi müayinələr aparılır. Sumqayıtda içməli su bütün tələblərə cavab verir”.
Əgər belədirsə, nə üçün son zamanlar su filtrlərinin satışı genişləndirilmiş şəkildə həyata keçirilir? Bunun üçün Sumqayıt şəhər Su Kanal İdarəsi tərəfindən hansısa tədbirlər görülürmü?
İdarənin rəis müavini Qurban Mikayılov bildirdi ki, Sumqayıtda içməli su bütün tələblərə cavab versə də, onların filtrlərin satışı üçün hər hansı bir tədbir həyata keçirmək səlahiyyətləri yoxdur:
"Sumqayıtda suyun təmizlənməsi üçün Ceyranbatan ərazisində böyük qurğu tikilib. Hazırda şəhər ərazisində içməli su bütün tələblərə cavab verir. Lakin çox təəssüflər olsun ki, bizim filtrlərin satışına qarşı hər hansı bir tədbir həyata keçirmək səlahiyyətimiz yoxdur”
Bəs su filtrləri ilə bağlı Azad İstehlakçılar Birliyinə (AİB) vətəndaş şikayətləri daxil olubmu?
AİB-in sədri Eyyub Hüseynov bununla bağlı saytımıza açıqlama verərək bildirdi ki, su filtrlərinin satışı ilə məşğul şirkətlərin həyata keçirdikləri təcrübələrin heç bir elmi əsası yoxdur:
"Su filtrləri ilə bağlı bizə ardıcıl şəkildə şikayətlər daxil olur. Gecə saat 1-də, 2-də camaatın qapısını döyərək layihə həyata keçirdiklərini bildirirlər. Bəziləri isə onların internet üzərindən (onlayn) satışını həyata keçirirlər. Geri qaytarmaq da mümkün olmur. Hazırda ölkəmizdə su filtrlərinin satışı ilə məşğul olan 20-dək şirkət var və insanları içdikləri suyun təhlükəli olduğuna inandırmağa çalışırlar. Ona görə də mən 4 gün öncə Məkkədən zəmzəm suyu gətirtmişəm. Həmin o şirkətlərin keçirdiyi təcrübəni mən dünyanın ən təmiz suyu üzərində keçirəcəm. Bundan başqa onların təcrübəsini yoxlamaq üçün bir neçə ölkədən də su sifariş vermişəm. Mənim fikrimcə, bu şirkətlərin həyata keçirdikləri təcrübələrin heç bir elmi əsası yoxdur. Bu, insanların aldadılmasına istiqamətlənib. "Azərsu” isə suyun təmiz olduğunu desə də, su filtrçilərinin ifşa olunması üçün heç bir addım atmır”.
Elnarə Salamova
Xeberle.com
Xəbərdən istifadə edərkən istinad etmək vacibdir.
