Yaşayış minimumunun 1 misli məbləğində olan hissəsi vergidən azad olacaq.

Yeni Qanuna əsasən, gəlir vergisindən azad edilən alimentin müəyyən edilməsi üçün tətbiq edilən əməkhaqqı məbləği artırılır.

Marja.az xəbər verir ki, bu cari ilin 4 fevralından qüvvəyə minən “Azərbaycan Respublikasının Vergi Məcəlləsində dəyişikliklər edilməsi haqqında” Qanunda əks olunub.

Belə ki, fiziki şəxsin əsas iş yerində (əmək kitabçasının olduğu yerdə) hər hansı muzdlu işlə əlaqədar əldə edilən aylıq gəliri 250 manatadək olduqda, əmək qabiliyyətli əhali üçün ölkə üzrə yaşayış minimumunun 1 misli, illik gəliri 3000 manatadək olduqda, əmək qabiliyyətli əhali üçün ölkə üzrə yaşayış minimumunun 12 misli məbləğində olan hissəsi vergidən azaddır.

Halbuki, bundan əvvəl aylıq gəlir məbləği müvafiq olaraq 200 və 2400 manat təşkil edirdi.

Qeyd edək ki, 2014-cü il üçün yaşayış minimumu ölkə üzrə 125 manat, əmək qabiliyyətli əhali üçün 136 manat, pensiyaçılar üçün 103 manat, uşaqlar üçün 103 manat məbləğində müəyyən edilib.

Bu Qanunun 1-ci maddəsində nəzərdə tutulmuş dəyişikliklər 2013-cü il sentyabrın 1-dən tətbiq edilir.