"Şəhər və şəhərətrafı rayon və qəsəbələr üçün gediş haqqı 0,30- 0,90 AZN civarında müəyyən edilib. Sakinlərin məlumatlı olmaları üçün konkret qiymətlər avtobusların içərisində asılıb. Sumqayıtda 230-a qədər iritutumlu (167 yeni, təxmini 50 ədəd köhnə markalı), hardasa 30 ədəd də köhnə "MERSEDES” markalı nəqliyyat vasitəsi fəaliyyət göstərir."
Bu sözləri Xeberle.com-a açıqlamasında Sumqayıt Avtomobil Nəqliyyatı ilə Sərnişindaşıma İdarəsinin rəhbəri Tofiq Saydumov deyib. İdarə rəisi qiymətlərin artmasının avtobuslarda gündəlik planına da təsir etdiyini bildirib: "Çünki avtobuslar kreditlə götürülüb, müvəqqəti idxaldır. Biz onların gömrük rüsumunu, kredit borcunu ödəyirik. Onlar üçün ehtiyyat hissələri, yanacağa görə çəkilən xərclər var. Nəqliyyatda gediş haqqı üçün hansısa şəxslərə imtiyaz və ya güzəştlərin verilməsi məsələsinə gəldikdə isə, deyə bilərəm ki, hazırda ölkəmizdə bunun üçün heç kəsə imtiyaz verilməyib. Amma mən şəxsən gündəlik olaraq sürücülərə tapşırıram ki, imkanı olmayan və fiziki qüsurlu şəxsləri, qocaları nəzərə alsınlar. Onlarla çox dərin mübahisələrə getməsinlər”.
Qeyd edək ki, Tarif Şurasının verdiyi yeni qərar ilə Bakı şəhərində, həmçinin digər şəhər və rayonlarda sərnişindaşıma xidməti, şəhərdaxili məsafədən asılı olaraq 1 gediş üçün 30-90 qəpik təsdiq edilib.
Yeni qərar bu gündən etibarən qüvvəyə minib.
Elnarə Salamova
Xeberle.com
Xəbərdən istifadə edərkən istinad etmək vacibdir.
