"Sumqayıtda hazırda 1200-ə qədər fərqlənmə nişanı ilə fəaliyyət göstərən taksi var. Amma gələcəkdə bu işlərə daha ciddi nəzarət ediləcək, taksilərin fəaliyyəti üçün müəyyən edilmiş, nəqliyyatın hərəkətinə mane olmayan, alış- veriş mərkəzlərinə yaxın ərazilərdə taksi dayanacaqları istifadəyə veriləcək".
Bu sözləri Xeberle.com-a açıqlamasında Sumqayıt Avtomobil Nəqliyyatı ilə Sərnişindaşıma İdarəsinin rəisi Tofiq Saydumov deyib. Şəhərdə lisenziyasız fəaliyyət göstərən taksilərin çoxluq təşkil etdiyini bildirən idarə rəisi həmin şəxslərə də xəbərdarlıq edib: "Qanunsuz fəaliyyət göstərən taksilər tamamilə aradan qaldırılacaq və əvəzində fərqlənmə nişanı, həmçinin yaxa nişanı olan taksilər fəaliyyətə buraxılacaq. Həmçinin texniki və tibbi müayinələrə də ciddi nəzarət olunacaq".
T. Saydumov qeyd edib ki, taksi fəaliyyəti ilə məşğul olan hər bir fiziki şəxs fərqlənmə nişanı almaqla yanaşı, texniki və tibbi müayinədən də keçməlidir: "Taksi fəaliyyəti ilə məşğul olan şəxslər VÖEN açdıraraq hər ay 13 manat 50 qəpik ödəniş etməlidirlər. Qanunsuz fəaliyyətlə məşğul olanlarla bağlı mütəmadi olaraq Sumqayıt şəhər Polis İdarəsinin Dövlət Yol Polisi əməkdaşları tərəfindən tədbirlər həyata keçirilir. Bu şəxslərin qanundankənar fəaliyyətlərinin qarşısı alınır və onlar inzibati qaydada cərimələnirlər."
Qurum rəhbəri onu da bildirib ki, Sumqayıtda fəaliyyət göstərən taksilərin hərəkətinin tənzimlənməsi və duracaqların yaradılması üçün şəhər rəhbərliyinə müraciət edilib.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
