Yeni tədris ilinin başlaması ərəfəsindəyik. Şəhər və rayondan Sumqayıta təhsil almaq üçün gələnlərin əsas problemlərindən biri isə münasib qiymətə kirayə ev tapmaqdır.
Əmlak məsələləri üzrə ekspert Elnur Əliyev Xeberle.com-a açıqlamasında bildirib ki, əvvəlki illərə nisbətən kirayə evlərin qiymətlərində nəzərə çarpacaq dəyişiklik müşahidə edilmir: "Düzdür, tələbələr artıq ev axtarışına çıxıblar, lakin şəhər üzrə kirayə evlərin qiymətində artım yoxdur. Kollektiv yaşamağa üstünlük verənlər daha çox 2-3 otaqlı, tək yaşamaq istəyənlər isə 1 otaqlı mənzillərə üstünlük verirlər".
Kirayə mənzil axtarışında daha çox problemlə üzləşən tələbə oğlanlardır. Ekspert deyir ki, tələbə oğlanlara mənzil etibar edən ev sahibləri daha çox oğlanların əxlaqına və özlərini aparmaq qaydalarına fikir verirlər.
Elnur Əliyev onu da deyib ki, adətən may-iyul aylarında kirayə mənzil bazarında qiymətlər təqribən 6-7 faiz aşağı düşür, amma avqustun 20-dən sonra qiymətlər 13-15 faiz artır: "Hazırda 1 otaqlı əşyasız mənzil 100-150 AZN, əşyaları ilə 150-200 AZN, 2 otaqlı əşyasız mənzil 200-250 AZN, əşyalı 250-300 AZN arasında dəyişir. Yeni tikililərdə isə qiymətlər daha bahadır. Belə ki, 1 otaqlı əşyasız mənzil 300 AZN məbləğindədir."
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
