Bu sözləri Xeberle.com-a açıqlamasında Sumqayıtın Tarixi Muzeyinin elmi katibi Sənurə Lazımova deyib. S.Lazımova bildirib ki, əsasən, ümumtəhsil məktəbləri, tədris ocaqları ilə müqavilələr imzalayan rəhbərlik muzeyə gələn ziyarətçilərin sayını artırır: "Muzey 15 minə yaxın eksponatı ilə keçmişdən gələn tarixi gələcək nəsillərə çatdıraraq, ildən-ilə tarixi əhəmiyyətli əşyalarının sayını da artırır”.

Elmi katibin sözlərinə görə, hər il muzey ənənəvi olaraq üç istiqamətdə - toplama, elmi-maarifləndirici, təşkilati işlər əsasında nəzərdə tutulmuş mövzular üzrə əhəmiyyətli əşyalar əldə edir: "Muzeyin 2018-ci il yarımillik hesabatına nəzər yetirsək, bu müddət ərzində 70 sayda əşya toplanıb, onlardan 57-si əsas fonda daxil edilməklə muzeyin 13 sayda bölməsi üzrə yerləşdirilib. Tarix etibarı ilə ən qədim eksponat yaşı e.ə XII – XI əsrlərdən hesablanan yağ, süd saxlamaq üçün nəzərdə tutulan saxsı küpələrdir. Sumqayıtın ərazi tarixi ilə bağlı ən qədim eksponat saxsı şərab dolçasıdır ki, onun tarixi XII əsrdən hesablanır”.

S.Lazımova qeyd edib ki, elmi-maarifləndirici işlərə gəldikdə isə bu istiqamətdə də tədbirlər həyata keçirilir: "Təbliğat xarakterli tədbirlər mühazirələrin dinlənilməsinin təşkili, muzeydaxili və muzeydənkənar sərgilərin tərtibatı, tədbirlərin keçirilməsi ilə baş tutur. Cari ilin səkkiz ayı ərzində keçirilən tədbirlərin sayı 11, dinlənilən mühazirələrin sayı 19, tərtib olunan sərgilərin sayı isə 11-dir.” Xatırladaq ki, Sumqayıtın Tarixi Muzeyi 1967-ci ildən fəaliyyət göstərir.