"Azərikimya” İstehsalat Birliyinin (İB) müəssisələrində payız iməciliklərinə start verilib. İlk belə tədbir 20 sentyabr-"Neftçilər günü” peşə bayramı ərəfəsində keçirilib.
Birliyin Etilen-polietilen zavodu, Təmir-tikinti İdarəsi və Baş ofisin İdarəetmə aparatından ümumilikdə 150 nəfər əməkdaş iməcilikdə iştirak edib.
Böyük ruh yüksəkliyi şəraitində keçən iməcilik zamanı kimyaçılar Etilen-polietilen zavodunun azot-oksigen qurğusu sahəsində 400 ədəd müxtəlif növ ağac əkiblər.
Paralel olaraq əsas qüvvələrini Etilen-polietilen zavodunun və Təmir-tikinti İdarəsinin daxili ərazilərinə cəlb edən kimyaçılar iməcilik boyu müvafiq sahələrdə təmizlik-abadlıq işləri aparıb, əvvəllər əkilən ağaclara aqrotexniki qulluq göstərib, diblərini belləyib, suvarma işləri həyata keçirib və əraziləri müxtəlif tullantılardan təmizləyiblər.
Sumqayıtın sənaye zonasında ekoloji mühitin daha da yaxşılaşdırılmasına və yaşıllıqların artırılmasına hesablanmış iməciliklərin payız mövsümü boyunca davam etdirilməsi nəzərdə tutulub.
Xəbərdən istifadə edərkən istinad etmək vacibdir.
